Dúas novas mortes por coronavirus tinxen de loito a evolución favorable da epidemia en Galicia nas últimas 24 horas. Segundo os datos facilitados pola Consellería de Sanidade, os falecidos son un home de 79 anos ingresado no CHUAC da Coruña e unha muller de 88 anos que permanecía no CHUO de Ourense. Os dous presentaban patoloxías previas.
O número de vítimas mortais do coronavirus en Galicia elévase así a 612, das que 480 foron en centros hospitalarios. Por áreas sanitarias, 128 producíronse na da Coruña, 102 na de Ourense, 92 na de Vigo, outras 86 na de Santiago, 30 na Ferrol, 26 na de Lugo (dúas delas en atención domiciliaria) e 16 na de Pontevedra.
A estas cifras hai que sumarlles as 132 persoas que morreron dentro das residencias de maiores da comunidade, onde non se notificaron novas vítimas desde hai dúas semanas (en concreto desde o 7 de maio).
Con todo, hai que ter en conta que, dentro do cómputo de falecidos en atención hospitalaria, hai 139 persoas que estaban vinculadas con residencias.
Así, morreron con coronavirus en Galicia 271 persoas vinculadas con centros residenciais, o que supón o 44,3 por cento do total de falecidos con Covid-19 na comunidade.
Porén, a evolución da epidemia está a ser favorable nas últimas datas, cunha significativa baixa do número persoas afectadas pola Covid-19. A Consellería de Sanidade informou que, na última actualización, o número de casos activos de coronavirus en Galicia é de 884, deles 221 son da área da Coruña, 56 da de Lugo, 127 da de Ourense, 37 da de Pontevedra, 264 da área de Vigo, 151 da de Santiago, e 28 da de Ferrol.
Do total de pacientes positivos, 11 permanecen en UCI, 66 están en unidades de hospitalización e 807 no domicilio. Polo de agora, en Galicia hai un total de 9.684 persoas curadas.
Aquí podes consultar os últimos datos do Ministerio de Sanidade
