Dentro da situación “estable”, en palabras dos responsables da consellería de Sanidade, o lixeiro aumento da transmisión da Covid-19 en Galicia levou ao subcomité clínico reunido na mañá do venres a establecer un novo mapa de restricións nos concellos que entrará en vigor na medianoite do domingo 25 ao luns 26. Cinco concellos (Carballeda de Valdeorras, Cualedro, A Pobra do Caramiñal, O Grove e Vilanova de Arousa) estarán durante a semana que vén con peche perimetral, prohibición de reunións de persoas non conviventes e peche dos locais da hostalaría, entre outras restricións. Nestes cinco municipios, aínda que a tendencia é distinta na última semana, a incidencia sitúase por riba de 250 nos últimos 14 días. Co novo mapa, todos os municipios da contorna da ría de Arousa, un dos lugares onde se está a constatar maior transmisión, estarán en niveis maiores de limitacións cá meirande parte de Galicia.
A medida chega no día no que o Sergas notificou 226 casos confirmados mediante PCR entre as 18 horas do mércores e o xoves, o que supón a maior cifra do último mes. Ademais, despois de semanas por baixo dos 200 casos diarios, os positivos comezan a superar este limiar na última semana. A incidencia acumulada no conxunto de Galicia, segundo datos do Ministerio de Sanidad, é 93,20 casos/100.000 habitantes a 14 días e de 44,93 a unha semana.
Niveis alto e medio
Ademais dos cinco concellos en nivel máximo, os municipios de Lobeira, Muiños, Petín, O Barco de Valdeorras, Meira, Ribeira, Cambre, Marín, Meis, Meaño, Ribadumia e Ponteareas ficarán no rango de restricións “altas”. Isto supón o peche do interior dos locais da hostalaría e a capacidade máxima do 50% no exterior, ademais doutra serie de medidas contempladas na normativa que entrou en vigor despois dos novos pasos na ‘desescalada’ (máis información aquí).
Ademais, as medidas do nivel medio rexerán nos concellos de Cartelle, Lobios, Cortegada, Padrenda, Verín, Chantada, Boiro, Rianxo, Carnota, Carral, Catoira, A Illa de Arousa, Cambados, Vilagarcía de Arousa, Poio, Sanxenxo, Cangas, Gondomar, e Vigo.
Nos outros 275 concellos manteranse as medidas fixadas no nivel medio baixo. Isto é, entre outras restriccións, as terrazas dos locais de hostalaría estarán ao 75% e o interior, ao 50% da súa capacidade. Como en todo o territorio, rexerán os límites de reunións para catro persoas non conviventes en interiores e seis en exteriores, o peche perimetral da comunidade autónoma e o confinamento nocturno entre as 23 e as 6 horas.
Así quedará, por tanto, o mapa a partir do luns:
