A última semana dun novembro pasado por auga en Galicia comeza coa previsión dun novo temporal que golpeará o noroeste da península na xornada do martes. Despois do paso de Cecilia, agora son os restos do ciclón tropical Sebastien, que vén de pasar sobre o arquipélago dos Azores, os que obrigan a activar un aviso laranxa por vento, con refachos que poderán superar os 100 quilómetros por hora en boa parte de Galicia.
Bos días! Hoxe os ventos do suroeste deixan un día de nubes, con orballos na franxa atlántica e temperaturas suaves.
Vemos no satélite a ex-tormenta tropical Sebastien, que no seu desprazamento cara ao sur de Irlanda, deixará en #Galicia mañá martes un episodio de ventos fortes. pic.twitter.com/q8Hlg1qdmc— MeteoGalicia (@MeteoGalicia) November 25, 2019
Sebastien, xa convertido en borrasca, segundo informan desde MeteoGalicia, deixarase notar a partir da mañá do martes. Este luns xa hai un aviso de nivel amarelo entre Bares e Barbanza por vento no mar de sudoeste, con forza 7, e ondas de entre 4 e 5 metros. Para mañá a partir do mediodía quedará o máis intenso do temporal. O aviso será laranxa no mar por ondas de ata sete metros e ventos de forza 8.
En terra, os restos de Sebastien obrigarán a elevar o aviso a laranxa en toda a provincia de Lugo, o interior da Coruña e Pontevedra e o sur e o leste de Ourense, por refachos de máis de 100 km/h. No resto do territorio o aviso será amarelo.
25/11 11:21 #AEMET actualiza #FMA en Galicia. Activos hoy y mañana. Nivel máx naranja. Imagen del mapa de avisos en vigor a las 11:21 . Para ver una tabla de avisos actualizada haga CLIC EN LA IMAGEN o visite https://t.co/Mw1O1wz2vE https://t.co/ffeZ66zruC
— AEMET_Galicia (@AEMET_Galicia) November 25, 2019
O impacto da borrasca diminuirá na tarde-noite do martes, e o mércores agárdase unha xornada de transición. Porén, adiantan desde MeteoGalicia que a situación de inestabilidade manterase ata o domingo 1 de decembro. É posible que o xoves sexa unha nova xornada pasada por auga, incrementando así o nivel de precipitacións deste mes, no que moitas estacións meteorolóxicas non rexistraron nin un só día sen chuvia.
