Chega a Galicia o frío polar. Case literalmente, porque unha potente borrasca con aire xeado procedente de Groenlandia, caerá sobre o país a partir deste xoves, nunha fronte acompañada de fortes precipitacións, alerta laranxa no mar, fortes ventos e a cota de neve que baixará este venres ata os 700 metros.
Meteogalicia activou avisos laranxas por ondadas de 5 a 8 metros no litoral norte de Galicia xa para este xoves e venres. Ademais, o vento será moi forte na costa, así como tamén en varias zonas do interior, onde hai activados tamén avisos amarelos.
Xa sabemos que a borrasca que chega mañá ven con aire frío, polo que o venres teremos neve por debaixo dos 1000 metros, veremos mañá con que avisos⚠️.
Pero ollo tamén coa situación marítima, xa que as ondas superarán os 7 metros no litoral norte tanto o venres como o sábado🌊. pic.twitter.com/pXNNA5guNy— MeteoGalicia (@MeteoGalicia) December 2, 2020
A profundísima borrasca baixará desde latitudes polares e os mapas debuxan unha infinidade de isobaras paralelas que guían cara ao sur unha masa de aire polar e ártico, que acabará topándose coa Península Ibérica.
As temperaturas que prognostica o modelo europeo serán moi baixas, co que se esperan xeadas en boa parte do país. A masa de aire polar marítimo irase retirando a partir do domingo aínda que continuaremos na influencia das borrascas, con alta probabilidade de chuvia, ata o final do período. As temperaturas terán un aumento progresivo a partir da vindeira semana.
Aquí podes consultar os novos avisos amarelos e laranxas de Meteogalicia
