A Sociedade Xeolóxica Española, a Asociación Española para o Ensino das Ciencias da Terra e o Instituto Xeolóxico e Mineiro organizan, un ano máis, o Xeolodía. A actividade de divulgación terá lugar o sábado seis de maio para achegar a xeoloxía á sociedade.
O principal obxectivo é observar as características morfolóxicas nun breve traxecto nos arredores da vila termal de Partovia. “O tipo de rocha dominante é o granito adamellítico de dúas micas. No traxecto que se vai a percorrer durante o Xeolodía, e que segue as marxes do río Varón, afluente do Avia, teremos ocasión de estudar os tres tipos de cavidades características deste granito, como son as covas de fisura, covas de bloques e tafone”, apuntan os organizadores.
O campus de Ourense volverá a implicarse na súa celebración na provincia, participando na organización a docente da Área de Xeografía Física, Elena de Uña. A cita consta dunha excursión guiada polas covas graníticas de Adeghas en Partovia, O Carballiño. A inscripción é gratuíta e aberta a todas as personas interesadas.
A organización implica a membros do club espeleolóxico Cetra e do Instituto Universitario de Xeoloxía da Universidade da Coruña, ademáis da Facultade de Historia do campus de Ourense. “Ao longo da xornada, poderán descubrir e coñecer aspectos sobresaíntes do noso patrimonio xeolóxico e xeomorfolóxico. Será unha boa ocasión para apreciar, comprender e valorar tanto a orixe como as características singulares do patrimonio natural ourensán”, afirma de Uña.
