Dez relatores e os dez varóns. Ningunha muller entre os 10 participantes escollidos pola Universidade de Santiago de Compostela para o seu ciclo de charlas titulado “Hoxe xa é o día despois”, que dá cita a prestixiosos expertos en economía e dereito.
Este ciclo de encontros online está organizado polo CiTIUS, GSI, o grupo de investigación Valoración Financeira Aplicada e a Rede Empresa Investigación, todas elas entidades da Universidade de Santiago, coa colaboración do Foro Económico de Galicia, e comezou este luns coa charla a cargo do economista Emilio Ontiveros, presentado polo profesor da USC Luis Otero.
Ao longo das vindeiras semanas, expertos nacionais e internacionais, todos eles homes, abordarán temas relevantes no contexto da crise á que nos enfrontamos: a recuperación económica, a renda básica, o futuro do traballo, a intelixencia artificial fronte á pandemia, os dereitos fundamentais e a protección de datos, a automatización e a dixitalización, ou o futuro dos ODS 2030, entre outros.
A listaxe de relatores, tras Ontiveros e Otero, continuará o 29 de abril con Ricard Martínez, Roberto Blanco Valdés e Luis Míguez Macho, nunha mesa redonda na que falarán de “Os dereitos fundamentais tras a crise da Covid-19”.
Continuará o ciclo o 5 de maio coa charla “A renta mínima”, coa participación de Fernando Fernández Méndez, Luis Ayala Cañón e César García Novoa.
E o ciclo da USC rematará o 7 de maio coa charla “Educación durante a pandemia”, a cargo de Faraón Lloréns e o catedrático Senén Barro.
As charlas poden seguirse en liña a través dunha ligazón que facilita a USC.
Comentar só que na web oficial da USC [https://www.usc.gal/gl/xornal/eventos] si están publicadas todas as charlas, incluídas mulleres, e que é a única fonte oficial dos datos. Ese cartel non é un cartel publicado pola USC senón por colaboradores a título individual.