Baixo o lema Cabo Ortegal. Unha viaxe ao centro da Terra a Deputación de A Coruña presentou en Fitur a súa aposta por visibilizar o xeoparque como destino turístico. A presentación, que tivo lugar no stand de Galicia, ensalzou os valores dos sete municipios coruñeses —Cariño, Cedeira, Cerdido, Moeche, San Sadurniño, Ortigueira e Valdoviño-— que abarcan a área.
Segundo o vicepresidente da Deputación de A Coruña e deputado de Turismo, Xosé Regueira, a presentación constitúe un paso máis no que esperan que sexa a certificación de Cabo Ortegal como Xeoparque Mundial por parte da Unesco. “Cabo Ortegal é un terreo cuns valores xeolóxicos absolutamente singulares e incuestionables”, declara.
Humanizar o proxecto
Un dos retos do xeoparque de Cabo Ortegal foi o de poñerlle rostro ao proxecto. Para iso, a presentación estivo conducida pola ferrolana Paula Vázquez e intervida por diferentes persoas con perspectivas diferentes sobre Ortegal. Entre elas, a consultora e coordinadora de Goodlife María Mesías; o presidente da Asociación Xeoparque Cabo Ortegal, José Miguel Alonso; o conselleiro de Turismo, Alfonso Rueda, e o propio Xosé Regueira, que destacou as posibilidades que ofrece este espazo para o desenvolvemento dun turismo científico, xeolóxico e consciente.
“Ortegal pode desfrutarse a través de diferentes experiencias, dende facer unhas rutas de sendeirismo a unha camiñada contemplativa coa cámara fotográfica na man”, engade Regueira. A parte máis social apareceu na presentación en formato de vídeo coa proxección de catro spots que recollen o testimonio de persoas de diferentes ámbitos e sectores da sociedade de Ortegal, desde empresarios de distintos sectores ata representantes do deporte ou da cultura.
Paisaxe única
Os 600 quilómetros que integran o xeoparque de Cabo Ortegal inclúen unha paisaxe singular, con espazos naturais dunha beleza fascinante. Entre eles, as praias de area negra de Cedeira —as únicas de Europa en ter area negra sen ser volcánica—, o entorno da Serra da Capelada, as minas de cobre ou os cantís de Loiba, os máis altos de europa continental. “É unha auténtica gozada para os sentidos”, apunta Regueira.
“A costa de Ortegal daría para varios dos bancos máis bonitos do mundo”
Dende a Deputación tamén teñen unha proposta de cara ao futuro inmediato. A idea é crear unha marca de calidade do producto agroalimentario deste espazo, por ter unhas características singulares. Desta forma, Cabo Ortegal constitúe un destino turístico integral que pode xerar suficientes ingresos para a comunidade local.
Atraer ao turismo de peregrinación
Regueira aproveitou a presentación para lanzar unha proposta. Xa que en Ortegal está o santuario de Santo Andrés de Teixido, un dos máis antigos de Galicia, búscase animar ao turismo de peregrinación. A lenda de San Andrés dí que “quen non vai de vivo unha vez, vai de morto tres. E tirando dese fío, dende a Deputación queren “transmitir que para desfrutar da gloria, entendida como unha comunión co medio natural, non chega con ir ata Compostela ou Fisterra, hai que chegar a San Andrés”. En palabras de Regueira, “sería como unha especie de xubileo xeolóxico”.
