A revista Mazarelos está de celebración: acaba de sacar o seu décimo número. Como é habitual, a unha ilustración ocupa a portada. Nesta ocasión, o laranxa e o verde son as cores protagonistas grazas dunha lámina da artista galega Sarai Lorenzo Broullón.
Máis polo miúdo, os dous primeiros artigos deste número están relacionados co patrimonio. Sara Fraga Pérez achéganos ao patrimonio inmaterial a través dunha conceptualización teórica do concepto e de exemplos prácticos dalgúns proxectos nos que participou na comarca das Mariñas. Pola súa banda, Alba Rivas Regal e Jorge Viz González analizan e contextualizan o Monumento de Manuel Pailós, artista galego emigrado en Uruguai desde novo. A dita escultura atópase no campus norte da Universidade de Santiago de Compostela.
Seguen dous artigos de historia. O primeiro, asinado por Marco Antonio Álvarez Sánchez, analiza o termo de liberdade desde a antigüidade clásica até a contemporaneidade. Deseguido, Diego García Couso presenta un estudo de caso realizado no CPI Virxe do Monte (Cospeito) co alumnado de 4º de ESO sobre a súa representación dos fascismos.
A entrevista deste número está protagonizada por dúas persoas que se moven no mundo do fotoxornalismo: Charo Lopes e Brais Lorenzo. Estudaron na Escola de Arte Superior e Deseño Antonio Faílde de Ourense, aínda que en cursos diferentes, e desde aí comezaron a traballar desde espazos e ópticas distintas. Isto é o que precisamente fixo que a súa conversa fose moi distentida e moi entretida, a cal xirou sobre a cultura da inmediatez, a intelixencia artificial, as condicións laborais do sector e os espazos colaborativos, entre outros asuntos.
Pecha o décimo número Daniel García Fernández, presidente da Agrupación Instrutiva de Caamouco (Ares). No texto fai un repaso histórico da centenaria agrupación e achéganos ao seu papel na actualidade, onde constata a enorme pegada que ten na comunidade.