O enxeñeiro Fernando Pérez González, catedrático de Telecomunicación da Universidade de Vigo (Uvigo) e cofundador do Centro Tecnolóxico de Telecomunicacións de Galicia (Gradiant), foi galardoado cos II Premios Galicia Innovación e Deseño (ID) na categoría de traxectoria innovadora.
Os Premios Galicia ID financiados pola Xunta de Galicia a través da Axencia Galega de Innovación (GAIN), teñen como obxectivo recoñecer o labor das persoas e empresas que están a contribuír significativamente ao desenvolvemento económico e social galego a través da innovación e o deseño.
🏆 O enxeñeiro Fernando Pérez, catedrático de #Telecomunicación da @uvigo e cofundador de @Gradiant, galardoado cos II #premiosGaliciaID na categoría de traxectoria innovadora. Parabéns!@axenciaGAIN @galiciacrece @Xunta @atlanTTic_uvigo @ATIGA @RAGalegaCiencia pic.twitter.com/t6Nt44lrrn
— InnovaConDeseño (@InnovaDeseno) January 24, 2022
Currículum do premiado
Fernando Pérez González é Doutor de Enxeñería de Telecomunicación pola Universidade de Vigo e catedrático no Departamento de Teoría do Sinal e Comunicacións (TSC) desta mesma universidade. Foi impulsor e o primeiro Director Xeral de Gradiant (do 2007 ao 2014), un centro que combina I+D público e privado con máis de 100 empregados e motivo polo que recibe este galardón.
Pérez González é coautor de 70 artigos en revistas internacionais e máis de 180 en actas de congresos. É investigador principal da UVigo nos proxectos europeos CERTIMARK, ECRYPT, REWIND, NIFTY, WITDOM e UNCOVER. Dende o 2014 é membro da Real Academia de Ciencias de Galicia e desde 2016 do Fellow do IEEE.
Os premios
Os galardóns teñen como finalidade destacar as mellores prácticas para que sirvan de exemplo a todo o tecido empresarial galego, poñendo de relevo como a innovación e o deseño cumpren un papel fundamental para mellorar a competitividade das empresas e a calidade de vida das persoas. Estes premios convócanse no marco do Programa de Deseño para a Innovación e a Sustentabilidade 2024 (DIFERENZA). Céntrase na seccón innovación, con tres categorías: traxectoria innovadora, pequena e mediana empresa e gran empresa. E outra sección de deseño, coas categorías: profesionais, deseñadores mozos e empresas.
