Cal é o risco climatolóxico de Galicia? E de conflitos armados? Canto de vulnerable é o noso territorio a vivir desigualdade económica ou social? Estas cuestións, entre outras moitas, son respondidas nun mapa interactivo que, a través da análise de diversidade de datos públicos, crea un índice que mide o estado actual dun total de 44 indicadores como secas, incendios forestais, violencia local, malestar popular ou a dependencia da economía da agricultura a nivel mundial.
“Os perigos crean riscos só en combinación coa exposición e vulnerabilidade”. Baixo este lema créase o proxecto ‘Índice de vulnerabilidade, conflito e clima’, encargado polo Ministerio Federal de Asuntos Exteriores de Alemaña, co obxectivo final de entender e axudar a xestionar e mitigar os impactos adversos das ameazas climáticas e armadas a través da información que se reflicte neste mapa interactivo mundial.
Categorizado en tres cores, amarelo para a temática climática, vermello para conflitos e azul para vulnerabilidade, o mapa ―que se actualiza trimestralmente― permite visualizar o risco nestes tres eidos, subdivididos nun total de 44 indicadores, a través dun índice que vai do 1 ao 10, sendo o 10 a máxima gravidade, e representado por puntos que cobren áreas de 55 kilómetros cadrados.
Así, pódese ver que no relacionado coa climatoloxía de Galicia destacan parámetros como a exposición a riscos deste ámbito, que varía entre niveis de 2 a 5 dependendo da zona da comunidade, sendo o máis alto no suroeste de Pontevedra. Case cos mesmos números se representa neste mapa o índice sobre o perigo de cambios nas condicións climatolóxicas a longo prazo, sendo máis elevado na zona de Compostela, na comarca do Baixo Miño e nas de Verín e Viana.
De conflitos a vulnerabilidade
No eido dos conflictos, este proxecto aleman avalía con 1 e 2 a intensidade do malestar popular no territorio galego que aumenta a 4 no que se refire á persistencia do mesmo, sendo máis notorio nas áreas das cidades da Coruña, Santiago e Vigo. Estes dous parámetros teñen en conta as manifestacións públicas de insatisfacción e as queixas, como protestas e disturbios, que “poden ser un sinal de tensións existentes na sociedade e pode derivar nun conflito violento no futuro”, segundo indican na súa web. Pola contra, o perigo a conflito armado é cifrado cun 0 no territorio galego.
Por último, no que se refire a vulnerabilidade, dende este mapa interactivo avalían cun 3 sobre 10 a desigualdade económica que vive Galicia, e cun 2 a vulnerabilidade dun pobo desarraigado, tendo en conta que “as poboacións desprazadas, que tenden a estar marxinadas na sociedade e non contan co apoio público adecuado, viven en condicións precarias e cun acceso limitado aos servizos, o que os deixa nunha situación máis comprometida que nos seus países de orixe”.
