Tras medio ano de consultas e negociacións, as organizacións estudantís Agir, Comités e Liga Estudantil Galega presentaron este martes en Santiago de Compostela o proceso constituínte que van emprender e que dará paso á nova organización estudantil galega que se presentará en marzo. Segundo explican nun comunicado, este é o derradeiro paso cara a unidade das tres entidades nunha “nova organización do estudantado nacionalista galego” que procure un ensino galego, popular, democrático, combativo e feminista.
Este proceso de unidade arrincou a mediados de 2015, cando estas tres organizacións estudantís galegas daban a coñecer o proxecto de unidade orgánica e poñían en marcha as Asembleas de Base. Organizando o estudantado galego, un proceso que tiña como finalidade a constitución dunha nova e única organización estudantil galega. Como explicaban as representantes sindicais en rolda de prensa esta mañá, dende setembro creáronse asembleas de base en toda Galicia para levar a proposta e os obxectivos aos e ás estudantes de todos os recunchos de Galicia, co fin de “animalos a participar e a formar parte do mesmo”. Así, e despois dun cuadrimestre de traballo coas bases e tras varios meses de unidade de acción en xornadas de folga e outras reivindicacións, o proceso constituínte culminará o 6 de marzo na Asemblea Nacional Constituínte, data na que será presentada oficialmente a nova asociación, que como explican os representantes do alumnado, será unha organización “nacional, popular, feminista, asemblearia e combativa”.
No comunicado conxunto feito público polas tres asociacións este martes, tamén perfilan as liñas estratéxicas da nova estrutura estudantil, que pasa por seguir “loitando contra a Estratexia Universitaria e o 3+2, por unha universidade única galega ao servizo das estudantes, e non das grandes empresas; contra a LOMCE e a españolización do alumnado, por un ensino galego, público e de calidade; contra o adoutrinamento e o ensino patriarcal, o feminismo como ferramenta. Desde a futura organización, loitaremos por un ensino ao servizo do pobo e para o pobo”, conclúen.
BEN!!! Por algún sitio tiñamos que empezar, e as mocidades son o xerme do futuro ( e as veces, modelo de sentidiño). Que cunda o exemplo.