Na semana na que se celebraba o Día de Ada Lovelace-Byron, o pasado 13 de outubro, foron numerosas as iniciativas que conmemoraron a figura da considerada como primeira programadora informática da historia. Ademais do premio outorgado polo Colexio Profesional de Enxeñaría en Informática de Galicia (CPEIG) a Sabela Ramos, que traballa en Google Research, outras dúas enxeñeiras informáticas da Universidade da Coruña, Susana Ladra e Verónica Bolón, recibiron cadanseu recoñecemento da man de entidades de Euskadi e Cataluña.
A investigadora do Centro de Investigación TIC (CITIC) da universidade coruñesa Verónica Bolón Canedo foi galardoada co premio Dona TIC, que outorga a Consellería de Políticas Dixitais e Administración Pública da Generalitat de Cataluña, dentro do plan autonómico que ten por obxectivo o fomento das vocacións tecnolóxicas femininas.
Os galardóns Dona TIC recoñecen o talento, emprendemento e empoderamento no ámbito tecnolóxico de oito mulleres procedentes de diversos ámbitos, como son o empresarial, profesional, académico e iniciativas sociais. Así, tamén teñen a finalidade de ofrecer referentes a nenas e mulleres nas disciplinas STEM e a asumir posicións de liderado no sector. As oito galardoadas nesta sexta edición foron seleccionadas entre 85 candidaturas.
Verónica Bolón é doutora en Informática pola UDC, secretaria da Asociación Española para a Intelixencia Artificial (AEPIA) e está comprometida co fomento das vocacións científico-tecnolóxicas entre as nenas, coordinando o nodo do proxecto Inspira STEAM en A Coruña.
Pola súa parte, Susana Ladra González foi condecorada co premio “Ada Byron joven” que concede a Universidade de Deusto. O galardón, dotado con 1.000 euros, ten o obxectivo de fomentar as vocacións femininas no campo da investigación e o desenvolvemento tecnolóxicos, prestixiar a importancia da tecnoloxía en todos os ámbitos da vida e para o desenvolvemento social, e dar valor ao traballo e logros por parte de mulleres.
Susana Ladra foi recoñecida entre un total de 54 candidaturas pola súa formación, actividade profesional no sector tecnolóxico, implicación en difusión social, capacidade de superación e participación en iniciativas para propiciar cambios cara unha maior igualdade.
Ademais de investigadora do CITIC, Susana Ladra é directora do Campus Innova da UDC e vicepresidenta do Colexio Profesional de Enxeñaría Informática de Galicia (CPEIG). Tamén é coordinadora do programa STEMbach na UDC, que ten como fin de promover a vocación do alumnado cara a investigación científica.
