Un ano máis, a Real Academia Galega de Ciencias (RAGC), convocou os Premios de Investigación Ernesto Viéitez 2019, nas súas dúas modalidades de Premio ao mellor Traballo de Investigación, dotado con 6000 euros, e o premio á Promoción de Investigadores Mozos, menores de 30 anos, dotado con 2000 euros. O prazo da convocatoria finaliza ás 13.00 horas do 14 de Xuño de 2019.
Os premios teñen como principal obxectivo producir impacto na sociedade galega e sensibilizala sobre o valor socioeconómico do coñecemento, á vez que recoñecer e estimular o traballo dos investigadores.
Segundo indican as bases (ver PDF), poderán presentarse traballos realizados total ou parcialmente en universidades e noutros centros de investigación de Galicia. Os traballos tratarán sobre temas ou aspectos relacionados coas áreas de Matemáticas, Física, Física do Cosmos, Química, Xeoloxía, Bioloxía, Farmacia, Ciencias Sociais, Económicas ou Ciencias Técnicas.
Nas dúas modalidades, poderanse presentar traballos publicados a partir do 1 de xaneiro de 2019, traballos aceptados para a súa publicación ou traballos inéditos. En todos os casos os traballos adoptarán a forma utilizada para publicacións en revistas científicas. Non poderán presentarse traballos que obtivesen premios de características análogas a estes ou se atopen concorrendo a eles. Aqueles traballos que resulten gañadores ou ben reciban unha mención especial, non poderán concorrer a ningún outro premio de características análogas a estes ata o momento en que se proceda ao acto público de entrega dos premios e mencións.
No caso do Premio de Investigación, polo menos un dos autores deberá estar en posesión do título de Doutor. O Premio para Promoción de Mozos Investigadores poderá ser solicitado unicamente por investigadores que aínda non cumprisen os 30 anos o día que finaliza o prazo da convocatoria e que dispoñan da pertinente autorización dos restantes autores, se os houbese, no caso de traballos xa publicados ou aceptados para a súa publicación. Só se poderá optar a un dos dous premios convocados. Os Académicos Numerarios e Correspondentes da Real Academia Galega de Ciencias non poderán participar no concurso.
Desde 2014, estes galardóns de Investigación da Real Academia Galega de Ciencias chámanse Premios de Investigación Ernesto Viéitez, en recordo de quen fora segundo Presidente da Academia.
O formulario para a inscripción pode atoparse na páxina web da Academia, en formato PDF, nesta ligazón.
