Este martes a Universidade de Vigo asinou un convenio de colaboración coa Confederación Hidrográfica do Miño-Sil para a subvención por parte desta última entidade de Redas. Revista de Derecho, Agua y Sostenibilidad, nacida no marco do proxecto de especialización do Campus da Auga. Trátase da primeira publicación xurídica española especializada en auga e medio ambiente e unha mostra de como “vamos dando chanzos que van visibilizando” o traballo que se está facendo arredor do Campus da Auga para ser un referente no seu eido, tal e como recalcou Salustiano Mato, reitor da Universidade de Vigo, durante o acto de sinatura.
Só a Confederación Hidrográfica Miño-Sil incoa cada ano máis de 4.000 expedientes xurídicos
O acto contou coa participación, ademais do reitor, de Francisco Marín, presidente da Confederación Hidrográfica do Miño-Sil; Virxilio Rodríguez, vicerreitor do campus de Ourense, e Roberto Bustillo, director da publicación. Alén da sinatura concreta deste convenio, apuntou Mato, “a Confederación é un auténtico aliado estratéxico do campus de Ourense e do Campus da Auga”, que “nos anima a seguir nese ambicioso camiño de especialización”. Dentro desta especialización, subliñou o reitor, “o dereito ten unha relevancia moi importante” xa que a auga é cada día máis “un recurso regulado e escaso” sometido a un marco normativo local, estatal e internacional de carácter complexo e complicado. Por este motivo, afirmou, “a auga é un campo fundamental para os expertos xurídicos” e o dereito “un eixe temático fundamental do Campus da Auga”, polo que salientou a maridaxe entre profesionais e temáticas que ofrece Redas.
Sobre esta relación dereito-auga, o presidente da Confederación Hidrográfica do Miño-Sil recalcou que ao longo do ano a súa entidade xestiona arredor de 4000 expedientes de diferente tipo, desde concesións de obra ata sancións, tendo algúns deses expedientes unha complexidade técnica que leva aparellada unha importante carga xurídica. A publicación, de carácter electrónico e xestionada desde a Facultade de Dereito, nace co obxectivo de ir máis alá dunha revista e converterse nun foro para o intercambio de experiencias e coñecemento xurídicos e de xestión entre profesionais especializados en recursos hídricos, medio ambiente e desenvolvemento sustentable. Co seu número cero xa dispoñible on line, a sinatura deste convenio vén a afianzar o seu desenvolvemento cando os seus promotores están traballando na elaboración do seu seguinte número.
