Máis de trinta especialistas en topoloxía de varias universidades españolas asistiron estes días na Facultade compostelá de Matemáticas a unas xornadas organizadas pola Rede Española de Topoloxía, que organiza regularmente xornadas temáticas interdisciplinares de curta duración, perfil especializado e carácter innovador.
Nesta ocasión o encontro buscaba coñecer resultados e establecer liñas de investigación comúns entre as áreas da topoloxía e a combinatoria, unidas historicamente por múltiples relacións e que ultimamente cobraron un renovado interese impulsado polo desenvolvemento de ferramentas informáticas e pola aparición de novas aplicacións.
Así, as conferencias versaron sobre temas relacionados coa robótica, a topoloxía computacional aplicada á visión por ordenador, técnicas topolóxicas de tratamento de datos ou análises de redes biolóxicas, xunto a outras de carácter máis teórico.
Entre os relatores destacaron Gabriel Minian, da Universidade de Bos Aires, especialista en topoloxía alxébrica, topoloxía combinatoria, xeometría discreta e aplicacións, e Francisco Santos, da Universidade de Cantabria, galardoado co Premio Fulkerson pola súa refutación da importante conxectura de Hirsch, relacionada con problemas de programación lineal.
A topoloxía é a rama das matemáticas dedicada ao estudo daquelas propiedades xeométricas que permanecen inalteradas por deformacións continuas tales como estirar e dobrar, pero non cortar nin pegar. Recentemente foi noticia pola concesión do Nobel de Física a tres investigadores que explicaron o comportamento de supercondutores e superfluídos utilizando ideas procedentes desta especialidade.
