A Real Academia Galega de Ciencias (RAGC) e a Deputación de Pontevedra celebran este xoves, 25 de maio, ás 19.00 horas unha nova sesión do Ciclo de Conferencias Aida Fernández Ríos, centrada no proceso de descarbonización. Trátase dunha actividade gratuíta destinada a espertar o interese do gran público sobre temas de actualidade científica con repercusión social, impulsando ademais o enorme labor científico que se leva a cabo en Galicia. Para participar, é preciso inscribirse na web da Deputación de Pontevedra.
Esta nova sesión leva por título Combustibles sostibles para un futuro descarbonizado e será impartida por Jacobo Porteiro Fresco, catedrático da Área de Máquinas e Motores Térmicos da Escola de Enxeñaría Industrial da Universidade de Vigo. Ademais, está vinculado ao Centro de Investigación en Tecnoloxías, Enerxía e Procesos Industriais (Cintecx) da mesma institución académica.
Este ciclo de conferencias en liña arrincou o 4 de maio e estenderase ata o 15 de xuño. A seguinte cita é, precisamente, o día 1 do vindeiro mes, na que o catedrático da UVigo Marcos Curty Alonso abordará a revolución cuántica, tratando de prognosticar como serán os ordenadores do futuro. Ao xoves seguinte, o 8 de xuño, a profesora da Universidade Pompeu Fabra Ana Freire dará un relatorio sobre como a intelixencia artificial pode contribuír positivamente na saúde mental. Para rematar o ciclo, o 15 de xuño o catedrático da UVigo David Posada explicará nun relatorio por que se producen os tumores.
Amais das conferencias en liña, o ciclo Aida Fernández Ríos tamén contempla as conferencias en centros de ensino. De feito, contémplanse un total de cinco relatorios sobre temas tan diversos como o big data, as terapias contra o cancro, as bacterias que degradan plástico, as superbacterias e os datos. Todas as conferenciantes serán mulleres galegas: Susana Ladra, Azucena Mora, Rosa Crujeiras, María Dolores Mayán e Sabela Balboa.
