A Universidade da Coruña lidera xunto coa Universitat de les Illes Balears o Ránking das bibliotecas universitarias españolas, segundo un estudo que acaba de facerse público e que analiza a eficiencia das bibliotecas entre os anos 2008 e 2012.
Os autores do informe son José Simón Martín e Alicia Arias Coello, ambos os dous da Universidad Complutense de Madrid, e Clara Simón Blas, da Universidad Rey Juan Carlos. O informe considera á UDC como a mellor no ámbito da eficiencia na súa xestión do persoal e pode ser considerada como referente. A misión da Biblioteca da UDC é dar soporte á docencia, á aprendizaxe, á investigación e á formación integral do seu estudantado e profesorado en particular, e de todas as persoas en xeral. Para isto facilita o acceso e a difusión dos recursos de información, xestiona espazos, equipamentos e servizos, e colabora nos procesos de transformar a información en coñecemento. Desta forma, a Biblioteca aporta valor e contribúe ás funcións da Universidade ao servizo da sociedade.
Os 103 bibliotecarios da BUDC atenden a 26.698 usuarios desde 17 puntos de servizo. Integran a colección da Biblioteca 872.642 libros, 25.000 ebooks e 46.000 documentos noutros formatos, como mapas, microformas, DVD, etc. A BUDC conta tamén con 9.000 revistas en papel e 21.974 en formato dixital, ademais de dar acceso a 49 bases de datos que cubren todas as disciplinas científicas. O horario xeral de atención ao público é de 08.30 h a 21.30 h, de luns a venres.
Máis información: http://www.udc.gal/biblioteca/
http://redc.revistas.csic.es/index.php/redc/article/view/922/1334
