Unha tartaruga de coiro (Dermochelys coariacea) foi capturada accidentalmente entre nasas preto de Cabo Home. Investigadores da Coordinadora para o Estudo dos Mamíferos Mariños (CEMMA) puideron estudar o exemplar, que pertence á especie máis grande das tartarugas e que neste caso pesaba 175 kg.
A tartaruga levaba unha chapa identificativa que lle foi colocada por investigadores no Caribe e que, segundo informa a CEMMA, amosa que o animal xa atravesou o Atlántico. A coordinadora salienta que as nasas “son un arte moi selectivo mais, polo que temos visto nas costas galegas, perigoso para esta especie, momos e xibartes”.
A tartaruga era unha femia de metro e medio e 175 kg que foi trasladada ao porto de Vigo para a súa análise, o que permitiu comprobar a presenza de plásticos no estómago (recadro na foto), que a pesar de non ser letais neste caso, si poderían ter afectado á mucosa dixestiva. Esta é a especie de tartaruga mariña de maior tamaño, e tamén a que aparece en maior frecuencia en augas galegas.
