Pensaba que era un can, pero estaba a convivir cun lobo. No municipio ourensán de Quitenla de Leirado, Michel, un alemán afincado en Galicia, levaba anos convivindo co que el cría que era unha cadela da raza lobo checo. Tiña toda a documentación en regra que así o acreditaba e o cánido contaba co chip identificativo regulamentario. Pero desde hai anos, os seus veciños sospeitaban que a cadela de Michel era realmente unha loba ibérica.
Un deles chamou á Garda Civil de Ourense e comezaron as investigacións. O Servizo de Protección da Natureza (Seprona) da Comandancia da provincia informou esta mañá que o pasado 14 de novembro tivo coñecemento de que un veciño de Quintela de Leirado tiña nunha leira próxima á súa vivenda un cánido que polo seu comportamento e morfoloxía podería tratarse realmente dun lobo. Tras inspeccionar ao animal, o Seprona recolleu o pasado día 10 de febreiro unha mostra biolóxica e enviouna para analizar o ADN co fin de desvelar a incógnita e a través dos xenes determinar con seguridade de que raza se trataba.
As probas realizáronse no Departamento de Medio Ambiente do Servizo de Criminalística da Garda Civil. “Obtívose o perfil xenético dos restos biolóxicos analizados, e confirmouse que se trataba dun exemplar de Canis lupus signatus (Lobo ibérico)”, explica a Garda Civil nunha nota de prensa.
Pero a loba tivera tres cachorros híbridos tras cruzarse cun can común, que tamén estaban ao cargo do alemán. Desde o pasado 12 de febreiro, os catro animais están ao cargo do Servizo de Patrimonio Natural da Consellería de Medio Ambiente da Xunta de Galicia. O seu propietario entregounos voluntariamente para que os coidasen.
