A carne de vacún comercializada nos matadoiros de República Dominicana responde a parámetros normais en canto á presenza e acumulación de subtancias contaminantes, polo que, segundo se deriva da investigación universitaria, cómpre descartar que este produto alimentario constitúa un risco para a saúde pública.
A tese de doutoramento presentada na Facultade de Veterinaria do Campus Terra da Universidade de Santiago de Compostela (USC) por Jaime Rafael Santoni baixo o título Contribución ao estudo de acumulación de diversos residuos químicos e de medicamentos veterinarios en gando vacún da República Dominicana, conclúe que os niveis de substancias contaminantes nas mostras analizadas non superan aos parámetros máximos permitidos pola lexislación.
Algúns contaminantes
Alén desta consideración xeral, a investigación desenvolvida por Jaime Rafael Santoni, e dirixida polos catedráticos da USC José Luis Benedito Castelleto e Carlos Manuel Franco Abuín, serviu para detectar algúns casos positivos de contaminantes (como substancias antiparasitarias e metais pesados) das 800 mostras sometidas a análise, aínda que con porcentaxes moi baixas.
Os resultados obtidos nesta investigación apuntan que a carne de vacún criado e comercializado en República Dominicana presenta uns parámetros acaídos e equiparables a outros países no eido da seguridade alimentaria en canto a presenza de contaminantes se refire, segundo conclúe Rafael Santoni, que centrou as súas pescudas na detección de residuos de fármacos.
O tribunal encargado de avaliar a investigación de doutoramento presentada de xeito telemático estivo formado por un comité internacional presidido polo profesor de Nutrición da Facultade de Medicina da Universidade de Valladolid, Emiliano Quinto.
