A Noitevella virá pasada por auga. A tan só catro días de despedir o ano, as chuvias foron e están a ser as protagonistas indiscutibles da recta final de 2022. Durante a Noiteboa e o Nadal rexistráronse fortes chuvias e ventos; un patrón que se repetirá na fin do ano, segundo os prognósticos ofrecidos por Meteogalicia. A partir do sábado 31 de decembro haberá unha entrada de sucesivas frontes a Galicia que marcarán unha alta probabilidade de chuvia. No que respecta ás temperaturas, non haberá cambios significativos e as mínimas seguirán sendo altas para a época do ano. A predición para os primeiros días de xaneiro é semellante, cunha diminución da probabilidade de chuvia conforme avanza a semana.
Malia a tregua destes días, nos que predominaron as nubes e claros en boa parte do país, a delegación da Axencia Estatal de Meteoroloxía en Galicia avisa da chegada dunha fronte fría durante a tarde deste mércores. O fenómeno será a consecuencia dunha borrasca situada actualmente sobre o Atlántico que está a iniciar o seu movemento cara a Irlanda. Así é que xa está activada a alerta amarela para este mércores nalgúns puntos de Galicia. O aviso meteorolóxico débese aos fortes refachos de vento no mar, afectando á Mariña, a Costa da Morte e o Noroeste da Coruña. No que respecta ao resto do territorio, o día comezará con chuvias polo oeste que se irán xeneralizando co avance da tarde polo resto do país.
Despois do paso desta fronte, o xoves 29 Galicia quedará nunha zona de chuvascos. Segundo o prognóstico de Meteogalicia, agárdase un día nubrado son chuvias frecuentes durante a mañá. En relación ás temperaturas, as mínimas ascenderán e as máximas manteranse. Na antesala da Noitevella, o venres 30, a borrasca situada ao noroeste da península comezará a exercer a súa influencia sobre o territorio, con chuvias en practicamente toda Galicia, sendo máis persistentes no interior de Pontevedra e na zona do Xurés. Meteogalicia pon a atención sobre os refachos de vento, que poderán acadar ata os 80 quilómetros por hora. Ao día seguinte, en Noitevella, predominarán as chuvias, cunha probabilidade do 90% na maioría das cidades galegas.
