Galicia viviu unha fin de semana de inestabilidade pero logrou escapar dos efectos dunha potente DANA que deixou inundacións históricas en Madrid e Toledo, así como varios mortos e desaparecidos. Nos dous últimos días o foco meteoróloxico estivo posto no centro peninsular pero agora os expertos xa miran cara ao Atlántico. O furacán Franklin, convertido agora nunha potente borrasca, estase achegando ao oeste da península ibérica. Segundo apuntan varios servizos meteorolóxicos, vai interaccionar e absorber a DANA que causou grandes estragos en Madrid e Toledo. E non só iso, senón que este mesmo fenómeno é o responsable de que os restos de Franklin afecten a Galicia nos próximos días.
Segundo explica o investigador da Axencia Estatal de Meteoroloxía (AEMET) Juan Jesús González Alemán na súa canle de Twitter, “a DANA actuará como atractor dos restos de Franklin, que chegan dende o oeste”. Debido a este efecto, o ex furacán avanzará polo Atlántico xa convertido en borrasca. Espérase que os efectos deste fenómeno cheguen a Galicia a partir da segunda metade de semana. Polo momento, o prognóstico mantense en gran inestabilidade en todo país, con temperaturas que rozarán os 30 graos e maiores probabilidades de chuvias conforme se achegue a fin de semana.
O efecto Fujiwhara
Tal e como explica o meteorólogo Francisco Martín León dende o portal Meteored, o proceso polo que o ex furacán vai absorber a DANA observouse poucas veces en España. A esta interacción entre dous sistemas de baixas presións denomínase efecto Fujiwhara, que provoca que os dous fenómenos “orbiten” un arredor do outro, sendo o máis potente de ambos o que “sobreviva”. “Se a súa intensidade fose equivalente, os dous ciclóns empezarían a orbitar en torno a un punto entre eles. No caso contrario, se houbese diferenzas de intensidade, o vórtice maior será o sistema dominante sobre o vórtice menor, obrigando a este último a que orbite arredor del”, explica Martín León nun artigo publicado este luns en Meterored. O experto tamén lembra que o efecto Fujiwhara foi bautizado así en honor a Sakuhei Fujiwhara, o meteorólogo xaponés que describiu este comportamento en 1921.
A interacción entre os dous fenómenos producirase ao longo desta semana. Segundo o prognóstico de Meteogalicia, tanto o mércores como o xoves agardanse días de estabilidade atmosférica con temperaturas que roldarán os 28 graos. Porén, o escenario comeza a cambiar a partir do venres. “Galicia quedará nunha situación de moita inestabilidade atmosférica, con aire cálido en superficie e aire frío nas capas altas da atmosfera. Así, a probabilidade de precipitación será alta en xeral, con chuvascos localmente tormentosos”, explican dende o portal meteorolóxico galego. Malia a incerteza dun prognóstico a tantos días vista, todo apunta a que a inestabilidade dará unha tregua a mediados de semana e volverá a fin de semana como resultado dos restos do furacán Franklin.
