Cuberta instalada en Lugo, premiada polo Congreso Mundial de Enxeñaría da Madeira, Foto: USC.
Cuberta instalada en Lugo, premiada polo Congreso Mundial de Enxeñaría da Madeira, Foto: USC.

Premio mundial para a ‘gridshell’ do campus de Lugo

O Congreso Mundial de Enxeñaría da Madeira celebrado en Seúl (Corea do Sur) premiou a estrutura de madeira de eucalipto (‘gridshell‘) instalada en Lugo polo grupo de investigación Plataforma de Enxeñaría da Madeira Estrutural (Pemade), dirixido polo catedrático Manuel Guaita.

O galardón, outorgado pola reunión máis importante do mundo sobre Enxeñaría da Madeira, recoñeceu as investigacións desenvolvidas para o deseño e construción da estrutura situada no Campus Terra.

A de Lugo é a primeira cuberta deste tipo construída no mundo con madeira de eucalipto

O traballo foi desenvolvido por enxeñeiros e arquitectos da USC e da Politécnica de Madrid: Antonio José Lara Bocanegra, Antonio Roig, Almudena Majano Majano e Manuel Guaita, que presentaron unha nova cuberta de tipo gridshell elástica, a primeira realizada en España e primeira no mundo que emprega como material de construción a madeira de Eucalyptus globulus.

A técnica da ‘gridshell’

gridhsell de Pemade componse de láminas de madeira en retícula curvadas elasticamente. Estas láminas constrúense a partires de pezas rectas e idénticas de madeira serrada. Esta técnica permite crear estruturas de grandes dimensións dobremente curvadas simplemente entrecruzando as láminas en capas sucesivas, coma se dun tecido se tratase.

Este primeiro prototipo de gridshell, ademais de destacar pola súa estética, cumpre tamén un cometido funcional, xa que serve de cuberta dun espazo habilitado como almacén para madeira de Pemade. A súa estrutura ten 24 metros de lonxitude, e dado que se apoia unicamente nos seus lados curtos, logra salvar unha luz de 15 metros e ten 4,5 metros de voo en cada extremo.

O investigador Antonio José Lara recolle o galardón para a gridshell no Congreso Mundial de Enxeñaría da Madeira celebrado en Seúl. Foto: USC.
O investigador Antonio José Lara recolle o galardón para a gridshell no Congreso Mundial de Enxeñaría da Madeira celebrado en Seúl. Foto: USC.

O emprego de madeira de Eucalyptus globulus vén dado pola súa idoneidade e polas súas propiedades resistentes, ademais de por tratarse dunha madeira que non presenta practicamente nós. Daquela, cómpre lembrar que se trata da especie forestal clasificada en Europa para uso estrutural con maiores propiedades resistentes.

Este traballo achega varias novidades no ámbito das gridshell de madeira como un concepto estrutural de cuberta longa apoiada só nun dos seus lados curtos e o emprego dunha terceira dirección de láminas dobradas para proporcionar rixidez á cizalladura no plano da cuberta.

A estrutura é o resultado dun traballo desenvolvido no marco do LIFE Lugo+Biodinámico, un proxecto impulsado polo Concello de Lugo, como entidade coordinadora, e no que participa a Universidade de Santiago de Compostela e a Universidade Politécnica de Madrid. O proxecto está financiado pola Unión Europea, a través do programa LIFE, e a  Deputación Provincial de Lugo.

1 comentario

  1. ¿Iso non é o que sempre se chamou unha estructura en cerchas ? A madeira de eucalitpo non parece a mellor pero entendo que está tratada. Arquitectonicamente gustame moito.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.