Aparecen grandes cantidades de bólas de plástico nas praias da ría de Noia

A Asociación Noia Limpa denuncia a aparición de extensas capas de bólas de plástico en varias praias da ría de Muros e Noia. Trátase da dispersión dunha gran cantidade do que parecen ser estabilizadores UV —un composto que protexe os plásticos da luz solar—. As primeiras detectáronse na praia de Espiñeirido (Porto do Son) o 15 de decembro. Dende entón a asociación denuncia a súa aparición nos areais de Queiruga (Porto do Son), As Furnas (Porto do Son) e Lariño (Carnota).

Dende a Asociación Noia Limpa atribúen as bólas de plástico a unha vertedura, dado que se atoparon sacos co nome de Bedeko Europe, unha empresa polaca que se dedica á subministración de polímeros. Dende a entidade local apuntan que a propia compañía avisou da vertedura a mediados de decembro. Dende entón, Noia Limpa trata de darlle visibilidade ao plástico que aínda permanece nas praias e demanda “a súa retirada inmediata”.

Publicidade

Dende a asociación advírtese da perigosidade destas verteduras e sinálase que nunca se producira unha dispersión tan grande. “Houbera casos puntuais pero sempre de menor tamaño”, apuntan fontes da entidade. Noia Limpa asegura que un responsable de medioambiente está a facer un rastrexo por toda a costa para detectar en que arenais houbo verteduras e animan, a través das redes sociais, a que todas as persoas que viven cerca das praias se acheguen a comprobar se tamén atopan sacos ou residuos plásticos deste tipo.