O confinamento está a provocar unha drástica baixa dos niveis de contaminación en Europa. Tan importante é o cambio que os satélites poden detectalo, como é o caso do Copernicus Sentinel da Axencia Europea do Espazo, que amosa caídas significativas das concentracions de dióxido de nitróxeno en todo o continente, tamén en Galicia.
A pandemia causada polo novo coronavirus está a crear todo tipo de caos para a sociedade humana. Pero para a vella Terra, e para os humanos e as criaturas que respiran o seu aire, supón unha bocalada de aire puro.
Reflectindo o que sucedeu en China durante o peche, Europa agora está a ver a mesma caída na contaminación do aire.
Estes datos proveñen da ESA e o seu satélite Copernicus Sentinel-5 P . Amosan as emisións de dióxido de nitróxeno (NO2) sobre Europa en marzo de 2019 nun cadro, e entre o 14 e o 25 de marzo no seguinte cadro. O vermello denso indica maiores emisións de NON2.
Científicos do Real Instituto Meteorolóxico dos Países Baixos (KNMI) están a utilizar o satélite para monitorear o clima e a contaminación en Europa. Non só París amosa unha gran caída, senón tamén cidades como Milán e Madrid.
O equipo de científicos utilizou datos que abarcaron 10 días en 2020. Henk Eskes é un dos científicos de KNMI. Nun comunicado de prensa , explicou por que se elixiron estas datas: “As concentracións de dióxido de nitróxeno varían dun día a outro debido aos cambios no clima. As conclusións non poden extraerse en base a só un día de datos. Combinando datos para un período específico de tempo, 10 días neste caso, comezamos a ver o impacto dos cambios debido á actividade humana“.
Parte do NO2 é producido por procesos naturais como a respiración bacteriana, os raios e mesmo os volcáns. Pero a maior parte é producida por nós: principalmente a queima de combustibles fósiles en motores de combustión interna. Pero coas restricións á mobilidade en toda Europa, esas emisións diminuíron.
Estes datos e imaxes satelitais son só o primeiro paso para os científicos, que en todo o mundo están a traballar nunha análise máis detallada para tratar de comprender os efectos xerais do peche polo coronavirus.
Un pico de contaminación revela o aumento de tráfico antes da ponte de San Xosé
En Galicia, a rede de Calidade do Aire que coordina a Consellería de Medio Ambiente, e cuxos datos recolle MeteoGalicia, amosa tamén un descenso moi notable das emisións de diversos compostos contaminantes desde as primeiras medidas de limitación de movementos, nos días previos ao anuncio do estado de alarma, o venres 13 de marzo. “Desde o día 11 xa detectamos unha baixada das emisións de contaminantes como os óxidos de nitróxeno, sobre todo nas cidades”, explicaba a GCiencia na primeira semana de confinamento Nuria Gallego, xefa de sección e responsable de Calidade do Aire da Subdirección Xeral de Meteoroloxía e Cambio Climático da Xunta. Neste sentido, segundo os datos que achega a Dirección General de Tráfico (DGT), no noroeste de España o tráfico chegou a caer ata un 90% nos últimos días respecto a un día equivalente e ‘normal’ previo á crise.
En toda Europa, os científicos xa traballan para extraer as mellores conclusións desta situación excepcional. Porque están ante unha ocasión irrepetible. “Para estimar cuantitativamente os cambios nas emisións debido ao transporte e a industria, necesitamos combinar os datos do satélite Copernicus Sentinel-5 P con modelos de química atmosférica”, dixo Henk: “Estes estudos comezaron, pero tardarán un tempo en completarse”.
Daquela, estamos a ver unha ollada dun futuro potencial aquí? Tomaremos máis en serio o “teletraballo” no mundo futuro? Será unha forma de suprimir as nosas emisións atmosféricas nocivas? Ou volveremos á nosa antiga normalidade, onde as autoestradas están bloqueadas con vehículos?
Lamentablemente, en China, onde os bloqueos entraron en vixencia primeiro, as emisións xa están a comezar a volver á normalidade.
Aquí podes consultar o informe da ESA sobre NO2 e Copernicus Sentinel
