Alén da cuestionada xestión forestal en Galicia, de cando en vez aparecen exemplos que son recoñecidos por organismos internacionais. É o caso do traballo dos comuneiros de Froxán, en Lousame, e Santiago, no Covelo, que acaban de entrar a formar parte do rexistro ICCA, que elabora o Programa de Nacións Unidas para o Medio Ambiente. Son as primeiras áreas da península Ibérica e as terceiras de Europa en acadar este recoñecemento.
Esta lista recoñece os mellores exemplos da xestión comunal do territorio por parte dos seus habitantes.
As liñas mestras de ICCA, nome baixo o que se recoñecen todos aqueles territorios xestionados polas comunidades locais, xiran en torno a tres puntos principais: unha comunidade ben definida e vencellada ao territorio (veciños, gremios, ou asociacións dun determinado sector); un sistema propio de gobernanza e toma de decisións que teña en conta a participación da mencionada comunidade; e un compromiso de conservación e uso sostible do hábitat para evitar danos ou deterioro medioambiental.
Na súa web, o rexistro ICCA destaca o traballo realizado polos comuneiros de Froxán, en Lousame, que nos últimos anos levaron a cabo un amplo traballo de concienciación sobre o territorio, dando a coñecer a recuperación que fixeron na zona. Entre outras intervencións, actuaron nas zonas afectadas polos antigos traballos de minaría e eliminaron algunhas especies invasoras, que substituíron por especies nativas.
