Armad, a primeira grande borrasca deste outono con influencia en Galicia, non dá tregua. A Dirección Xeral de Emerxencias e Interior da Xunta activou a alerta laranxa máxima polo forte vento que está a correr polo litoral galego. Nomeadamente, nas costas de Pontevedra e A Coruña. Aínda que a súa forza chegou tamén ás localidades do interior: a pasada madrugada, Lugo e Muras rexistraron refachos de ata 115 kilómetros por hora e Baiona ondas no mar de case catro metros de altura.
Este fenómeno meteorolóxico de perigosidade media vai provocar que o sur e o suroeste sufran ventos de forza oito e que, probablemente, tamén sexa así no mar. Nese sentido, as ondas poderán alcanzar os seis metros de altura no oeste, suroeste e noroeste do litoral coruñés e pontevedrés. Esta mañá, os técnicos da Xunta recomendaban aumentar a precaución nos espazos exteriores e máis non achegarse innecesariamente ás liñas de costa como diques ou paseos marítimos, xa que son espazos “onde o risco se multiplica”. Tamén recomenda extremar as medidas de seguridade para realizar calquera actividade no mar e que se revisen os cabos e amarres das embarcacións.
Que se espera esta fin de semana?
Con respecto ás temperaturas, o aire frío que arrastra esta borrasca e as frontes asociadas irán, de seguro, baixando aínda que amodo. Polo tanto, a situación na que se manterá o territorio é, por fin, máis parecida ao que adoita ser o outono galego. Espérase que as precipitacións non causen moitos problemas, senón todo o contrario: podería acontecer que a situación desfavorable dos encoros galegos comezara a mudar.
