O coello está ameazado en España, Portugal e o sur de Francia. Foto: Hanna Knutsson (CC BY-NC-ND 2.0).
O coello está ameazado en España, Portugal e o sur de Francia. Foto: Hanna Knutsson (CC BY-NC-ND 2.0).

O coello, “en perigo” na península ibérica

A revisión da lista vermella da Unión Internacional para a Conservación da Natureza advirte da situación deste mamífero

É, ao tempo, unha das especies máis daniñas nos lugares nos que foi introducida e un animal ameazado noutras partes do planeta. O coello europeo (Oryctolagus cuniculus) é, despois da revisión da lista vermella da Unión Internacional para a Conservación da Natureza (IUCN), unha especie “en perigo” en España, Portugal e o sur de Francia.

Segundo a información difundida por esta entidade, o coello está a sufrir un importante retroceso nas súas poboacións do suroeste de Europa, unha das súas áreas de distribución natural, debido á influencia de depredadores, como o lince ibérico e a aguia imperial (outras dúas especies que tamén están en situacións vulnerables) e, sobre todo, aos episodios de doenzas como a mixomatose e a enfermidade hemorráxica. Segundo datos da IUCN, estes factores provocaron “unha diminución estimada nas poboacións de coello de ata un 70%”.

A advertencia, con todo, abrangue á poboación salvaxe de coellos, e non aos criados en catividade para a industria alimentaria. Os exemplares que viven en liberdade víronse especialmente afectados pola alteracións dos hábitats e as doenzas contaxiosas, tal e como se pode ver neste gráfico difundido por WWF, aínda que ata hai pouco, grazas aos seus elevados índices de reprodución, a poboación podía manterse a pesar da caza.

Evolución da abundancia do coello durante as últimas décadas (Modificada de Moreno et al. 2007, modificado de Villafuerte et al. 2004).
Evolución da abundancia do coello durante as últimas décadas (Modificada de Moreno et al. 2007, modificado de Villafuerte et al. 2004).

Tal e como apuntan os expertos, o coello é un dos considerados como “enxeñeiros dos ecosistemas“, debido á súa capacidade para modificar o seu ambiente e mellorar así, en moitos casos, a dispoñibilidade de recursos para a súa e outras especies, tanto pola súa acción mecánica, ao escavar madrigueiras, como modificando a estrutura do solo e a vexetación coa súa actividade e os seus excrementos.

Porén, fronte a súa decadencia na área onde é considerado nativo, o coello é unha auténtica praga noutros lugares do mundo. En Australia, a onde chegou mediante os colonizadores británicos e se espallou ao non ter depredadores, poñendo en perigo outros centos de especies, a superpoboación chegou a acadar tal magnitude que o propio goberno decidiu liberar recentemente o virus letal que está decimando o animal en Europa para frear o crecemento do número de individuos.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.