A tempada de furacáns 2020 vai en cifras de récord. Xa hai 11 ciclóns con nome, que son dous máis dos que houbo no célebre ano 2005, cando o Katrina arrasou Louisiana a finais de agosto. Agora, a letra ‘K’ xa leva días en acción, coa tormenta tropical Kyle, que se formou fronte á costa leste dos Estados Unidos e que xa se move polo Atlántico cara a Europa. No ano 2005, houbo tantos ciclóns que, a partir de outubro, cando se nomeou ao furacán Wilma, houbo que empregar as letras do alfabeto grego para nomear aos seguintes: Alpha, Beta, Gamma, Delta, Epsilon e Zeta, este último xa o 30 de decembro. No portal especializado Cazatormentas recollen varios testemuños de meteorólogos que especulan con que este ano se repetirá a historia…
Didn’t we just do this yesterday? #Kyle breaks the 11th named storm record for the Atlantic basin; surpassing Katrina (Aug 24, 2005).
2020 now has broken the “earliest storm” date for 8 of its 11 storms. It trails only 2005’s 16 records out of 28 — which continues to dwindle. pic.twitter.com/NiqJ96Y5wY
— Steve Bowen (@SteveBowenWx) August 15, 2020
Pero tanta actividade ciclónica pode bater outra marca: a dunha cicloxénese explosiva a formarse fronte a Galicia en pleno mes de agosto. Cando estes fenómenos non adoitan comezar ata finais de setembro.
O responsable podería ser a propia tormenta tropical Kyle, que se move cara a Europa empuxado pola circulación xeral da atmosfera en latitudes medias. Deste xeito, espérase que faga unha transición extratropical e perda as suas características de tormenta tropical para transformarse nun borrasca. O caso é que esta transición pode ser moi rápida e ter as características dunha cicloxénese explosiva. Na que, ademais, pode atoparse con outra zona de baixas presións actualmente situada fronte ás illas Británicas… o resultado sería unha situación propia do outono e inverno pero no medio do verán.
Se as previsións son acertadas, a chegada dos efectos de Kyle a Galicia estaría prevista para a tarde do mércores ata a mañá do xoves, cunha noite de intensas choivas e refachos de vento.
Da situación final desta potente borrasca dependerá a virulencia dos efectos sobre Galicia, que deberían incluir tamén unha forte ondada, cunha situación moi complicada na mar. A evolución de Kyle vai coñecerse ao longo do martes con gran seguridade.
