Meteoros das Oriónidas. Foto: Wikimedia Commons.

Chega o máximo da chuvia de estrelas do cometa Halley

As choivas de estrelas non son só para o verán. O outono brinda tamén a ocasión de gozar do espectáculo astronómico. E esta fin de semana chega o máximo das Oriónidas, que alcanzan a súa máxima actividade na noite do 21 ao 22 de outubro. O mellor momento para observalas chegará durante a madrugada, despois do ocaso da Lúa.

Con todo, este ano non será especialmente “favorable” para a observación deste fenómeno, porque a Lúa estará en fase de lúa chea o 25 de outubro, segundo sinala o Observatorio Astronómico Nacional (OAN). Pola contra, os ceos despexados son unha oportunidade en Galicia para observalas.

As Oriónidas son unha choiva de meteoros de actividade moderada, cunha taxa de actividade de entre 15 e 70 meteoros por hora e unha alta velocidade, de 66 quilómetros por segundo. Poden observarse cara á constelación de Orión, razón pola que reciben este nome.

Tras das Oriónidas, as seguintes choivas importantes de meteoros serán as Leónidas do 17 de novembro (cunha taxa de actividade de máis de 20 meteoros por hora) e as Xemínidas do 14 de decembro (cunha taxa de entre 100 e 140 meteoros por hora).

Os meteoros das Oriónidas son fragmentos do cometa 1/P Halley. O Cometa Halley orbita ao redor do Sol cada 76 anos e foi visto desde a Terra por última vez en 1986. Como todos os anos por estas datas, a Terra atravesa un anel poboado cos refugalos desprendidos de Halley.

Cando un deses fragmentos (ou meteoroides) entra en contacto coa atmosfera terrestre, calcínase pola fricción co aire creando así o resplandor luminoso que se coñece como meteoro ou estrela fugaz. O cometa Halley tamén é a orixe doutra choiva de meteoros, as Eta Acuáridas, que teñen o seu máximo en torno ao 6 de maio.

1 comentario

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.