Unha masiva irrupción de po africano está a afectar a amplas zonas, desde Escandinavia ata o Atlántico Tropical. Ademais, a calixe estase a dirixir cara a América do Sur, pasando por Canarias, onde os índices da calidade do aire son malos. Dende o departamento de calidade do aire de Meteogalicia confirman que a calixe tamén chegou a Galicia. Os seus efectos estiveron presentes durante toda a fin de semana e prolongaranse ata o mércores. Isto fará que a calidade do aire sexa entre regular e mala, cuns índices de partículas de po en suspensión no aire de entre 20 e 50 miligramos por metro cúbico. Estes valores non son extremos, e “nada comparables ao episodio vivido en 2022”, confirma Nuria Gallego, investigadora do departamento.
Esta situación está provocada pola presenza dun anticiclón de bloqueo que será intenso, extenso e profundo, xa que ocupará unha gran porción da troposfera. Nestas condicións, os ceos estarán maioritariamente despexados, as temperaturas serán máis altas do normal para esta época do ano chegando a valores de máis de 20 graos. Adicionalmente, a ausencia de precipitacións será outro elemento clave nesta situación. Esta combinación de factores fai que o po africano sexa arrincado do chan e se interne sobre o Atlántico Norte, segundo explican nun artigo publicado no portal Meteored. A dispersión destas partículas de po é ampla, xa que se verán afectados millóns de quilómetros cadrados.
A Axencia Europea de Medio Ambiente (AEMA) establece un código de cores para medir a calidade do aire. Neste senso, a situación actual para Galicia atópase nunha calidade de aire medida en cor vermella, o que implica unha calidade mala. Os valores non son extremos xa que aínda están por enriba a calidade moi mala e pésima. Con todo, iso non significa que non haxa sectores da poboación que teñan que extremar as precaucións. Persoas con alerxias poden ver agravada a súa enfermidade, explica Gallego. Ademais, unha consecuencia “non tan intuitiva” é que os doentes de enfermidades do corazón tamén se ven afectados pola calixe. É por iso que a estas persoas se lles recomenda extremar os coidados sanitarios e, na medida do posible, evitar actividades ao aire libre. Ademais, tamén é recomendable o uso da máscara.
Onde si que se verán uns efectos máis adversos desta situación será nas Illas Canarias, onde as temperaturas máximas superan os 25 graos e o material particulado fino asociado a este po fará que o índice nacional da calidade do aire estea a tomar valores desfavorables para a saúde humana.
As consecuencias do po africano
Aínda que as irrupcións de po teñen a súa parte positiva como é a subministración gratuíta de nutrientes para os ecosistemas mariños e terrestres; tamén teñen efectos climatolóxicos negativos. Estes son as condicións de calixe, a redución da visibilidade, as subidas térmicas e a sequidade ambiental.
A irrupción de po africano non é en si un axente climático senón que é unha consecuencia dunha situación climatolóxica, sinala Gallego. A longo prazo pódese crear unha situación de efecto invernadoiro xa que non hai circulación do aire, “o que levaría a un recocemento“, explica. Neste senso, destaca que os cambios no clima provocan unha maior incidencia deste tipo de acontecementos.
