“O operativo está sendo complicado”, recoñecen dende a Coordinadora para o Estudo dos Mamíferos Mariños (Cemma). As circunstancias non parecen estar xogando a favor de Manoliño, o delfín que apareceu ferido cun arpón no porto do Freixo, en Outes. O golfiño, ao que tamén chaman Confi, xa é un vello coñecido na ría de Muros e Noia polas súas visitas recorrentes e a súa interacción —cada vez maior— con mariñeiros e nenos en praias e portos da zona. Pero agora, as noticias non son boas: o 112 avisou onte ao Cemma da sensible situación na que se atopa o golfiño. Dende aquela, a entidade galega traballa con cautela para retirarlle o arpón o antes posible.
Esta mañá, un equipo formado por media ducia de biólogos e veterinarios trataba de deseñar o mellor plan de acción posible. De feito, un dos grandes expertos en cetáceos de Galicia e integrante do colectivo, Alfredo López, estaba a valorar o estado do golfiño dende unha piragua. “Temos que decidir cal é a mellor forma posible de chegar a el. Sabemos que o obxectivo final é retirarlle o arpón, pero a operación non é fácil”, indican fontes do Cemma. Dende a entidade insisten en actuar con precaución, dado o complicado do operativo. “O único que podemos asegurar é que estamos a traballar ao 100%”, continúan indicando.
Unha situación imprevisible
Segundo as primeiras valoracións, o arpón está cravado superficialmente nun costado, na capa de graxa que cobre a pel destes cetáceos. Inicialmente, en función do que puideron observar esta mañá os expertos do Cemma, non semella que o arpón se movese de sitio nin causase máis dano ao animal. Porén, dende o colectivo advirten do imprevisible que pode ser a situación. “Non sabemos en que posición vai esta dentro de cinco minutos porque un dos aspectos fundamentais é que o delfín segue nadando. O arpón pode xerarlle unha infección, un quiste ou ser mortal? Si”, afirman dende o Cemma. E engaden que el mesmo tamén se pode facer dano sen querer.
A respiración dos cetáceos é voluntaria, polo que é imposible sedar o animal
Fontes do colectivo aseguran que, de momento, non saben cal será o procedemento a seguir para retirar o arpón. A operación habitual require de cortar a vara metálica para evitar que continúe en movemento e, despois, facer un corte o máis pequeno posible para extraela. Unha das principais dificultades coas que se atopa o equipo é a imposibilidade de sedar o animal. “Estamos a falar dun cetáceo. A súa respiración é voluntaria e non podemos facer ningunha manobra que provoque que o animal deixe de respirar”, indican dende o Cemma. Como exemplo, explican que hai ocasións nas que os golfiños quedan atrapados e poden falecer, precisamente, por este motivo: porque deixan de respirar.
Outra das grandes dificultades do operativo está no tamaño do animal. Dende o Cemma estiman que pode pesar arredor de 300 quilos. “É moi grande e está nun medio complicado, a auga. Non é o mesmo que traballar con animais terrestres”, explican fontes do colectivo galego. Declaran, tamén, que o máis importante é manter a serenidade e meditar moi ben o que se vai facer. Hai varias persoas intentando curar a Manoliño, tanto en terra como en mar. De momento, o Cemma non se atreve a estimar canto tempo pode levar a operación. “Estamos atentos. A idea é poder actuar o antes posible“, aseguran.
