O que nun tempo foi un criadeiro de referencia, que permitía a cría de ollomoles a gran escala nas augas de Lorbé (Oleiros), na ría de Betanzos en decenas de gaiolas, afronta na actualidade unha complicada situación debido ao concurso de acredores que enfronta a empresa propietaria, Isidro 1952. Segundo denunciaron os traballadores e recolle El Confidencial, os ollomoles, que subsisten nos criadeiros alimentándose de pequenos crustáceos, non reciben desde hai meses o penso que contribúe ao crecemento en condicións óptimas para a súa comercialización.
O plan de despedimentos, que afecta a máis da metade da plantilla de traballadores, deixou sen atención aos 1.200.000 ollomoles que se estima que habitan nas gaiolas de Lorbé. Algún dos coidadores cualifica a situación de “penosa”. A Xunta de Galicia realizou nas últimas semanas inspeccións nas instalacións, sostendo que a situación é de “normalidade”, pero xa se valoran alternativas debido á situación límite que afrontan os peixes. Así, contémplase a liberación dos peixes, unha medida solicitada pola propia empresa.
Os exemplares de Lorbé teñen entre oito meses e catro anos de idade, xa que a situación actual impide o crecemento de alevíns, que non se levan a esta planta desde novembro. O criadeiro onde nacían os alevíns e vivían ata os seis meses, en Valdoviño, xa está pechado.
A falta de alimento está provocando que os animais teñan un tamaño bastante menor ao habitual, e fai que cando un morre, os seus restos sexan inmediatamente devorados polos outros ollomoles. Fontes consultadas por El Confidencial apuntan que a situación mesmo afecta ao comportamento dos peixes, habitualmente fuxidíos. “Cando metes a man na auga, achéganse inmediatamente á expectativa de comida”.
