O proxecto de investigación Hippoparques, liderado polo Consello Superior de Investigacións Científicas (CSIC), permitiu localizar, identificar e gravar por primeira vez exemplares de cabaliño de mar Hippocampus guttulatus, coñecido popularmente como ‘narizón’, na contorna das Illas Cíes, a 7 metros de profundidade e no límite dunha zona areosa e rochosa cuberta de algas e macroalgas.
“Esta observación constitúe a primeira constancia científica da presenza da devandita especie no Parque Nacional das Illas Atlánticas de Galicia (PNIA), unha das dúas áreas, xunto co Parque Nacional do Arquipélago de Cabrera (PNAC) onde se está realizando o proxecto co fin último de identificar e caracterizar distintas poboacións cabaliños de mar e peixes pipa, peixes da familia Syngnathidae, cuxa presenza está estreitamente asociada á saúde e distribución de comunidades vexetais. Tamén se busca coñecer os hábitats que ocupan, as relacións coas especies vexetais que os estruturan, a súa epifauna acompañante e as relacións tróficas implicadas”, explica Miquel Planas Oliver, científico do CSIC e investigador principal do proxecto.
A presenza dos peixes pipa asóciase coa saúde das comunidades vexetais
En febreiro os investigadores xa confirmaron, no marco deste proxecto, a presenza no PNIA doutra especie de cabaliño de mar (Hippocampus hippocampus), polo que este novo achado revela por primeira vez a presenza e coexistencia de ambas as especies na zona.
“A análise xenética destes exemplares permitirá concluír se pertencen á mesma poboación que as que se atopan nas rías ou, pola contra, se se trata dunha poboación con características xenéticas diferentes, o que lle supoñería un feito moi interesante para a súa conservación”, avanza Miquel Planas Oliver.
Hippocampus guttulatus e H. hippocampus son as dúas únicas especies de cabaliños de mar presentes nas costas europeas, distribuíndose desde os Países Baixos ata o Mar Negro. Habitan en pequenas áreas de zonas costeiras, lagoas e estuarios. Ningunha das dúas especies é obxecto dunha explotación sistemática pero as súas poboacións son moi reducidas, sendo obxecto de protección por parte da lexislación vixente. Hippocampus guttulatus é a máis abundante das dúas, aínda que en Galicia a súa abundancia é máis escasa que noutras zonas e a súa distribución moi dispersa e pouco coñecida. Sábese que o seu hábitat está moi relacionado coa presenza de praderías de vexetais mariños, que os exemplares adoitan vivir entre 3-4 anos no medio natural e que se reproducen entre finais de primavera e finais do verán”, explica Miquel Planas Oliver.
O proxecto de investigación Hippoparques, está liderado polo CSIC. Conta coa participación do Instituto Mediterráneo de Estudos Avanzados (CSIC-UIB), de grupos de investigación das Universidades de Coruña e de Santiago de Compostela e do Instituto Español de Oceanografía (Centro costeiro de Vigo).
Os científicos presentarán un plan de protección e conservación destas especies
A súa finalidade é identificar e caracterizar hábitats de preferencia e fontes de alimentación de especies de peixes singnátidos, como os cabaliños de mar e os peixes pipa, nos Parques Nacionais Marítimo Terrestres das Illas Atlánticas (PNIA) e o Arquipélago de Cabrera (PNAC).
A investigación realízase mediante censos visuais e inclúe o estudo de biotopos e comunidades vexetais en transectos establecidos previamente pola potencial presenza de singnátidos, o seguimento das zonas susceptibles de albergar poboacións de signátidos e mostraxes e toma de mostras non invasivas para estudos xenéticos e de alimentación. En función dos resultados alcanzados, os científicos elaborarán e propoñerán ás autoridades competentes un plan de protección e conservación de especies de Singnathidae e de hábitats asociados no PNIA e o PNAC.
O día a día do proxecto está na web e na páxina en Facebook “Proxecto Hippoparques”.
