Xoves 23 Maio 2024

O Goberno avalou o eucalipto co informe dun catedrático que foi patrocinado por ENCE

Aquí podes ler a noticia en castelán:

El Gobierno avaló el eucalipto con el informe de un catedrático que fue patrocinado por ENCE

O Goberno recorreu a un experto que fora financiado por ENCE para tumbar o ditame do seu propio Comité Científico, que pedía declarar o eucalipto como especie exótica invasora. Luis Gil, catedrático da Universidad Politécnica de Madrid, é o autor do informe no que se apoiou a Subdirección General de Política Forestal para desautorizar ao Comité. No documento asinado por Gil criticábase e poñíase en dúbida a calidade científica do ditame, que fora apoiado de forma unánime por un grupo de expertos designados polo propio Ministerio.

Tal e como amosan informacións e documentación da propia empresa e a Universidad Politécnica de Madrid, o departamento de Xenética e Fisioloxía Vexetal, do que Gil é investigador responsable, participou nun proxecto que ENCE financiou en Etiopía.

Publicidade

ENCE e “Eucalipto solidario”

Información publicada na web da Universidad Politécnica de Madrid na que se menciona o patrocinio de ENCE ao congreso sobre o eucalipto en Etiopía.
Información publicada na web da Universidad Politécnica de Madrid na que se menciona o patrocinio de ENCE ao congreso sobre o eucalipto en Etiopía.

O proxecto “Eucalipto solidario” comezou en 2004, froito da colaboración entre o Grupo de Cooperación de Apoyo al Desarrollo Forestal da Universidad Politécnica de Madrid e o Ethiopian Institute of Agriculture Research, para favorecer o desenvolvemento de comunidades rurais das Terras Altas de Etiopía a través de actividades forestais. ENCE sumouse en 2006 e colaborou durante varios anos con cartos, persoal, coñecemento e materiais para poñer en marcha plantacións de eucalipto.

Desde entón, varias actividades dan conta da relación entre ENCE e Luis Gil. Así, nas memorias de sustentabilidade da empresa en 2008 e 2010 menciónase a colaboración co proxecto impulsado pola Politécnica de Madrid no marco das súas actividades de responsabilidade social corporativa. Segundo o recollido nestas memorias, a empresa enviou sementes e plantas de eucalipto ao país africano.

Nas actas do Congreso agradécese a ENCE o apoio financieiro que prestou

E en setembro de 2010 celebrouse no país un congreso que, segundo as informacións que se publicaron daquela, estaba patrocinado por ENCE. Levaba por título “Historia, estado actual e tendencias da xestión de plantacións de eucalipto en Etiopía”. Froito desta colaboración entre a pasteira, o grupo de investigación da Universidad Politécnica de Madrid e os científicos etíopes xurdiron varios artigos publicados en revistas científicas nas que se poñía énfase no suposto impacto positivo do eucalipto nos ecosistemas das Terras Altas de Etiopía e na economía da poboación local.

Luis Gil, en conversa con GCiencia, confirmou que ENCE financiou o Congreso. O catedrático, segundo el mesmo detallou, figura como responsable dun contrato de patrocinio polo que a empresa pasteira pagou 16.000 euros. Esta cantidade destinouse aos gastos de asistencia dalgúns dos participantes no Congreso, á infraestrutura do evento e á edición dun libro no que se recollen as achegas investigadoras. GCiencia contactou con ENCE para recabar máis información sobre este tema, pero aínda non obtivo resposta.

O apoio de ENCE aos proxectos de investigación no eido forestal non son un feito novidoso. Por exemplo, desde o ano 2000 desenvólvese na Universidade de Vigo a Cátedra ENCE, coa que se financia a creación de coñecemento destinada ao sector. Con todo, as colaboracións previas entre Luis Gil e a empresa poñen en dúbida, segundo fontes consultadas por GCiencia, a idoneidade de que el fora o experto no que se apoiase o Goberno para emitir unha resposta imparcial sobre o ditame do Comité Científico.

A polémica sobre o eucalipto

A comezos do mes de abril coñeceuse que o Ministerio de Agricultura, Pesca e Medio Ambiente rexeitaba declarar ao eucalipto como especie exótica invasora. Foi unha decisión adoptada en contra do que ditaminara, de forma unánime, o Comité Científico de Flora e Fauna Silvestre – un equipo asesor do propio Ministerio, e composto por investigadores de recoñecido prestixio – que recomendara a inclusión do xénero Eucalyptus no Catálogo Español de Especies Exóticas Invasoras.

No informe que tumbaba o ditame dos expertos que foran requiridos polo Goberno, e alén dunha serie de argumentos meramente científicos, a Subdirección General de Política Forestal criticaba aos investigadores con argumentos que poñían en dúbida o método científico empregado. Dicíase que había unha “actitude tendenciosa“, “en orde a emitir un xuízo de valor premeditado en canto ao carácter invasor destas especies, presuntamente baseado en criterios non científicos e en opinións persoais e políticas”.

Gil acusa de “maliciosas” as argumentacións do Comité e de “ignorantes” a “quen as acepta e defende”

E para reforzar o sentido da súa resolución, o Ministerio presentou o informe de Luis Gil, no que se cita unha bibliografía de 35 artigos. O documento, que levaba por título “Análise da ecoloxía de Eucalyptus nitens e do estado actual desta especie alóctona en España”, non só abordaba aspectos relacionados coa evidencia científica, senón que se dedicaba un longo apartado á importancia económica da árbore, especialmente no caso de Galicia, e se criticaba o “prexuízo estético e ideolóxico” que hai sobre o eucalipto respecto aos supostos danos que causa no ecosistema.

GCiencia tamén preguntou a Luis Gil pola posible parcialidade que puidera haber ante a súa colaboración con ENCE. Negou que haxa conflito de intereses, e engade que é “moi crítico” coa empresa nalgúns aspectos. O catedrático, profesor da Politécnica desde 1983 e estudoso do eucalipto desde hai máis de 30 anos. Expón: “A miña opinión está baseada no que di a ciencia sobre a especie”, di. E remarca: “Consultei outras fontes para completar a información allea á miña especialización para lograr unha visión máis completa”.

Sobre o ditame do Comité Científico, o catedrático di “que se atribúen (ao eucalipto) unhas cualidades non demostradas a unhas especies que son beneficiosas e ‘solidarias’ para a propiedade rural. Non se fala de calidade de paisaxe, que é unha cuestión opinable; fanse afirmacións que son consideradas opinións científicas e non son verdade, polo que contribúen á desinformación xeral”. E engade que os membros do Comité emiten “opinións persoais” que son “maliciosas, e quenes as aceptan e defenden, ignorantes“.

O procedemento, que comezara a raíz dunha solicitude do Concello de Teo para declarar ao eucalipto como especie invasora, seguirá nos tribunais nos próximos meses. Segundo confirmou o goberno local de Teo, recurrirán ao Contencioso a decisión do Goberno.

Tamén podes ler:

medioambiental/eucalipto-invasor-goberno/

medioambiental/informes-goberno-eucalipto/

 

 

 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Retirada unha acacia de tres toneladas á beira do Tins, o primeiro río de España con dereitos

Un grupo de 16 voluntarios participa na primeira xornada de eliminación de especies exóticas invasoras nas marxes do curso fluvial de Outes

Cambiar de modelo forestal e outras medidas para frear a expansión do eucalipto en Galicia

O Consello da Cultura Galega publica un informe que analiza o impacto sobre o patrimonio cultural e natural das especies forestais de rápido crecemento

Un proxecto da UVigo estuda como obter bioetanol a partir de eucalipto e mimosa

O obxectivo é investigar novas rutas de aproveitamento de biomasa forestal, concretamente de especies moi abundantes e invasoras en Galicia
00:05:41

O eucalipto, unha árbore maldita?

Chegou hai séculos a Galicia como unha especie exótica e hoxe é centro de todas as polémicas, e de moitas crenzas. Canto sabemos del?