Parecía que non chegaría, pero, ao final, chegou. Outubro inaugura, por fin, un outono que arrinca a deshora, pero que, tras unha semana de treboadas e fortes chuvias, parece que chega para quedar. As explotacións agrícolas e gandeiras de todo o país comezan a ver un futuro máis certo e se as condicións meteorolóxicas seguen este camiño, os encoros que estaban en situacións máis críticas poderán empezar a se recompoñer. Todo apunta a que así será. Polo menos iso din as predicións climáticas que estes días están a divulgar tanto dende a Unidade de Observación e Predición Meteorolóxica de Galicia como dende a Axencia Estatal de Meteoroloxía. Aínda que con matices, ambos servizos públicos garanten que a maioría dos dez días que lle restan ao mes estarán pasados por auga. Algúns deles, con chuvias intensas.
Con todo, a media dos valores históricos para este mes aínda queda lonxe e acadar certa normalidade dependerá, certamente, da intensidade coa que as nubes descarguen estes escasos dez días. De feito, nese sentido, MeteoGalicia publicou este venres unha comparativa para botar luz: “Comezaba outubro con tempo seco e a situación foi mudando coa chegada das borrascas. Comparamos a chuvia (litros/m2) rexistrada no que vai de mes co valor histórico. Non chegamos á media, mais cas previsións para os vindeiros días, todo parece indicar que será un mes chuvioso”, reflexionan.
Aínda que durante este venres Galicia seguirá baixo os efectos da borrasca Armand, este primeiro grande fenómeno meteorolóxico do outono estáse a dirixir xa cara ao norte de Europa e mañá atoparase lonxe do país e chegando ao norte de Irlanda. Así o explica a sede Galega da AEMET, que argumenta que, porén, as chuvias serán persistentes en todo o territorio. Para a fin de semana e respecto ás temperaturas, o aire frío que arrastra esta borrasca e as frontes asociadas irán baixando.
