Únete á nosa canle de Whatsapp
A tan só dous días para rematar o 2022, os prognósticos para a última noite do ano vanse confirmando. Despois de varias semanas chuviosas que regaron toda Galicia, a tendencia segue a ser clara. Ao longo do día 31 espéranse intervalos de nubles a claros con fortes ventos. O prato forte chegará durante a noite, cando as precipitacións comecen polo oeste da Coruña ata estenderse polo resto do país. “Chegará unha fronte moi activa, que se mostrará estacionaria. A día de hoxe non se pode concretar a cantidade de chuvia, se vai ser exactamente igual que a Noiteboa e o Nadal”, explican fontes de Meteogalicia.
Unha borrasca situada ao noroeste de Galicia é a responsable da chegada desta fronte tan activa que pasará por auga a Noitevella. “Vai ser unha situación meteorolóxica adversa como as que levamos vivindo nas últimas semanas. Non lle prestariamos máis atención se non fose pola data”, continúan explicando dende a axencia meteorolóxica. Tamén sinalan que as fortes precipitacións que recibiremos a partir do sábado caen enriba de máis chuvia. “As cantidades son elevadas porque non é o mesmo levar un mes sen apenas precipitacións que un decembro tan chuvioso. Hai algunhas estacións que xa recolleron máis do agardado para este mes”, matizan dende Meteogalicia.
“Vai ser unha situación meteorolóxica adversa como as que vivimos nas últimas semanas”
Fontes de Meteogalicia
Máis en detalle, informan que a mañá do día 31 vai ser “absolutamente tranquila”. O máis salientable durante a primeira metade da xornada será o vento. Estará causado por dous fenómenos. Por unha banda, a borrasca situada ao noroeste de Galicia e, por outra, unha ampla área de altas presións en todo o Mediterráneo. Isto provoca que se forme un corredor de isóbaras do suroeste que dea lugar a fortes ventos, que comezarán a diminuír na seguinda metade da tarde para dar lugar ás precipitacións.
Así é que comezará a chover polo oeste da provincia da Coruña e xa pola noite agárdanse precipitacións en todo o país. Segundo informan dende Meteogalicia, as chuvias afectarán en maior medida ás provincias atlánticas. “Vai haber momentos de intensidade forte. A cantidade de chuvia que se poida acumular, se é moi alta nalgún punto, virá dada máis por acumulación que por intensidade”, explican. As precipitacións serán constantes ata altas horas da madrugada, posto que continuarán regando o primeiro día do ano. Pero conforme avance o 1 de xaneiro as chuvias tamén irán diminuíndo. “Durante o día 2 agárdase moi pouca chuvia e a noite do 1 ao 2 apenas teremos precipitacións”, conclúen.
