As choivas de estrelas tamén son para o outono. E as noites despexadas brindan a oportunidade de contemplar o espectáculo, aínda que sexa con boa roupa de abrigo. As Leónidas alcanzarán o seu punto máximo o vindeiro 17 de novembro. A fonte deste evento é o cometa Tempel-Tuttle.
As Leónidas son estrelas fugaces que se fan visibles durante o mes de novembro, aínda que con máis intensidade desde o 15 ao 21 deste mesmo mes. O máximo sucede aproximadamente cada 33 anos. Tendo en conta que o seu último máximo foi en 1998, haberá que esperar ata 2031 para volvelas a ver da maneira máis impactante.
O certo é que desde finais dos noventa a actividade das estrelas vén sendo máis alta, un feito que favorece a súa observación á noitiña. Non fai falta que subas á montaña máis alta para gozalas, simplemente tes que te afastar da contaminación lumínica da cidade e comezar a pedir desexos, se ademais de amante da astronomía tamén tes crenzas supersticiosas.
Este ano o intre máis alto de actividade coincide coa fin de semana segundo a International Meteor Organization (IMO). Os días 17 e 18 deste mes espéranse numerosos meteoros. Aínda que o número non se pode calcular con exactitude, estímanse entre 15 a 20 meteoros por hora. A pesar de que a cantidade deles é elevada, hai que ter en conta que a Lúa estes días atópase na súa fase crecente -cuarto crecente o día 15- polo que a súa luminosidade podería afectar á visibilidade das estrelas.
Unha das características das Leónidas é que con frecuencia deixan unha estela de cor verde que persiste durante uns poucos segundos. Xa o observou o astrónomo Denison Olstead, da Universidade Yale, quen determinou que os trazos dos meteoros parecían provir da constelación de Leo, de aí o seu nome.
