Galicia vivirá no que queda de semana unha situación de pleno inverno, con fortes ventos, chuvia, neve e grandes ondas no mar. E a responsable desta situación haina que buscala en Groenlandia, de onde procede a borrasca qeu trae a do primeiro aviso de nivel vermello do outono, que estará activado o xoves desde as 12 do mediodía e ata a medianoite na costa de Muros a Ribadeo, debido a mar combinada con ondas de máis de oito metros.
Tal e como explica desde MeteoGalicia Juan Taboada, “é unha borrasca que vén polo Atlántico desde Groenlandia e desprázase rapidamente ata o norte da Península, porque nos Azores hai un anticiclón que xera un corredor e trae este temporal directamente cara a Galicia”. A situación máis perigosa, con todo, estará no mar, xa que se combina a forza das ondas que viaxan polo atlántico co impulso do vento na mesma dirección, o que as fará medrar por riba dos citados oito metros.
Porén, haberá temporal para todos. Este martes xa hai un aviso amarelo en toda a provincia da Coruña, interior de Pontevedra e montaña de Lugo e Ourense debido a acumulación de precipitacións por riba de 40 litros/metro cadrado en 12 horas.
Pero o xoves chegará o máis intenso. ademais da auga, o vento superará os 80 km/h nas provincias atlánticas, e a neve deixarase ver en gran parte do país. O aviso amarelo activouse por agora só no leste de Lugo e Ourense, pero algúns modelos da Axencia Estatal de Meteoroloxía (Aemet) apuntan a que se poderán ver folerpas en gran parte das dúas provincias, mesmo nas zonas máis altas de Pontevedra e A Coruña. Juan Taboada anticipa que as nevaradas por riba dos 800 metros van ser “bastante considerables” en Galicia.
A propia Aemet emitiu no mediodía do martes un aviso especial (ver PDF) que fala de espesores de ata 30-50 centímetros nas zonas máis altas, e de 5-10 cm entre 800 e 900 metros. A precipitación en forma de choiva podería sumar en poucas horas máis de 100 litros por metro cadrado.
Agárdase que a partir do venres a situación sexa máis estable, pero é posible que para a fin de semana regresen as chuvias e o vento con intensidade.
Só un detalle xeográfico, segundo a foto, a alerta sería dende Fisterra ata Ribadeo, non dende Corrubedo a Ribadeo
Edítome, non é Fisterra tampouco, é Louro. Dende logo Corrubedo non é, un saúdo
Ben editado.