A historia tradicional di que o castiñeiro foi introducido en Galicia durante o Imperio Romano, como tamén aconteceu coa vide. Pero novas evidencias desbotan esta teoría. O castiñeiro é unha especie autóctona de Galicia, que xa estaba presente no Noroeste da península Ibérica hai máis de 20.000 anos. Estes achados mudan absolutamente a idea de que estamos ante unha especie invasora que foi naturalizada.
O novo traballo foi liderado pola Universidade de Oviedo e confirma que a área cantábrica e atlántica da Península foi un dos principais refuxios climáticos do castiñeiro hai máis de 20.000 anos, durante a última glaciación.
O investigador José Valentín Roces Díaz empregou modelos matemáticos, nunha estadía na Universidade Masaryk da República Checa. O traballo revela que o último período glacial condicionou a moitas das árbores que agora son dominantes nos bosques europeos, obrigándoas a migrar ou buscar “zonas de refuxio” no sur de Europa.
O artigo aparece publicado na revista Palaeogeography, Palaeoclimatology, Palaeoecology e recolle unha serie de modelos espaciais para predicir a distribución do castiñeiro en Europa en base ás condicións climáticas actuais para logo facer unha extrapolación ás do último máximo glacial e do período especialmente cálido do holoceno medio (hai 6.000 anos).
En Viveiro, atopouse polen de castiñeiro datado hai 7.830 anos
Segundo o director do Grupo de Investigación de Sistemas Forestais Atlánticos ( GIS- Forest), Pedro Álvarez-Álvarez, os resultados destes modelos amosan que o castiñeiro atopou zonas de refuxio durante a última glaciación nas costas cantábrica e atlántica da península ibérica, así como en Italia e Turquía.
Na planificación de reforestacións e repoboacións, o criterio principal é que a recuperación natural leve a cabo soamente con bosque autóctono, aínda que en certas zonas permítanse plantacións alóctonas para a produción de madeira. O castiñeiro pode ter agora plena consideración de árbore autóctona, o que achega un novo concepto á política de conservación.
Xa outras investigacións anteriores sinalaban que existía o castiñeiro en Galicia moito antes dos romanos. Josefa Menéndez Amor y F. Florschütz atoparon no municipio de Viveiro restos fósiles de polen de Castinea sativa datados hai 7.830 anos, case seis milenios antes antes da romanización comezada na época do emperador Augusto.
Hola, hai algunha proba de continuidade de castiñeiro desde antes dos romanos ata ahora?