Como cada ano, os ceos de agosto reciben a visita da chuvia de meteoros máis característica do verán, coñecida como Bágoas de San Lourenzo ou Perseidas. Este 2024 o seu pico de actividade terá lugar a partir da fin de semana, sendo as noites entre o domingo e o sábado os momentos máis desexables para gozar do paseo da Terra a través dos restos do cometa Swift-Tuttle. Con todo, será posible ver a chuvia de estrelas en Galicia?
Noites escuras e con boa temperatura
A configuración atmosférica destes días está do noso lado: teremos unha das mellores condiciones dos últimos anos para gozar das Perseidas, xa que os ceos estarán despexados na meirande parte da comunidade na noite do sábado. O domingo é posible, segundo prognostica MeteoGalicia, que as nubes cubran parte do territorio, especialmente na costa e no interior de Lugo.
Aínda así, a lúa non será un problema: nestas datas atópase na súa fase de crecemento e está visible tan só nun 22-23 %, o cal deixará ceos nocturnos escuros. As temperaturas tamén serán favorables para a observación da chuvia de estrelas: a onda de calor que bate no resto de España deixará mínimas que roldarán os 20 graos na madrugada do domingo, segundo as previsións da AEMET.
Cara onde mirar na noite
Para gozar das Perseidas non é preciso empregar telescopios. A mellor recomendación é afastarse na medida do posible dos focos de contaminación luminosa, moi presente nas cidades, e adoptar unha posición tombada ou semitombada que permita observar calquera lugar da esfera celeste. En canto a onde fixar os nosos ollos, o punto radiante desta chuvia de estrelas atópase preto da estrela Mirfak (α Persei), na constelación de Perseo. O máis doado é mirar cara o nordés ao anoitecer, xusto no lado contrario de onde se atope a Lúa para que a súa luminosidade afecte o menos posible.
Para localizar a constelación de Perseo pódese buscar primeiro a de Casiopea, moito máis recoñecible dada a súa forma de W ou M, dependendo da orientación do ceo no momento no que miremos. Unha vez localicemos Casiopea, só temos que dirixir a nosa ollada cara abaixo e cara o este. Mirfak é a estrela máis brillante de Perseo, e é neste punto onde teremos unha maior probabilidade de ver as Perseidas.
Unha experiencia guiada nos ceos de Forcarei
O espectáculo das Perseidas pódese vivir da man de expertos grazas ás visitas guiadas que cada ano se fan en distintos puntos de observación astronómica. Dende fai anos, a Fundación CEO, Ciencia e Cultura do Observatorio de Forcarei ofrece a posibilidade de gozar dunha visita completa ás súas instalacións e comprender o traballo que realizan desde As Casetas.
Coa chegada das Bágoas de San Lourenzo, o Observatorio de Forcarei lanza unha convocatoria aberta ao público para gozar dun dos momentos máis agardados cada verano. As propias condicións da contorna tamén axudan: trátase dun dos ceos máis escuros e mellor valorados para a observación astronómica en Galicia.
