Únete á nosa canle de Whatsapp
Neste 2018, o Día Mundial do Medio Ambiente, que se celebra o 5 de xuño, pon de relevo o problema crecente da contaminación por plásticos, para apelar á poboación do planeta sobre a necesidade dun planeta libre desta contaminación. Cada ano vértense nos océanos oito millóns de toneladas de plástico, o que ameaza a vida mariña e humana, e destrúe os ecosistemas naturais. O obxectivo é concienciar sobre a necesidade de reducir a cantidade de plástico que termina nos nosos océanos. E a esta iniciativa súmase o Colexio Oficial de Biólogos de Galicia.
Neste sentido, o colexio lembra que desenvolve desde decembro, xunto co Parque Nacional Illas Atlánticas de Galicia, un proxecto denominado Rede para a recuperación dos ecosistemas mariños no Parque Nacional Illas Atlánticas de Galicia. Este proxecto conta coa colaboración da Fundación Biodiversidad, do Ministerio de Agricultura y Pesca, Alimentación y Medio Ambiente, a través do programa Pleamar do Fondo Europeo Marítimo y de Pesca (FEMP), dentro dunha iniciativa enmarcada dentro do proxecto LIFE IP INTEMARES, Gestión integrada, innovadora y participativa de la Red natura 2000 en el medio marino español.
O colexio desenvolve un proxecto para recuperar os sistemas mariños no arquipélago de Sálvora
O traballo, que ten lugar no arquipélago de Sálvora, na ría de Arousa, tanto na súa superficie terrestre como mariña. O seu obxectivo principal é conservar a biodiversidade e os ecosistemas mariños desde a sostibilidade, integrando á poboación local mediante a maior participación posible do sector pesqueiro, individualmente ou a través dos Grupos de Acción Local de Pesca (GALP). Colaboran tamén investigadores das tres universidades galegas, centros de investigación, voluntarios de diversa procedencia, asociacións, etc.
Especificamente trátase de fomentar o coñecemento, xestión e conservación dos recursos mariños especialmente nas zonas protexidas conforme á Directiva Marco da Estratexia Mariña, recoller as artes de pesca perdidas e outros refugallos mariños, favorecer a participación dos pescadores na protección da biodiversidade e mellorar o estado de conservación e a capacidade de renovación dos recursos naturais.
A última acción levada a cabo con este motivo foi unha xornada de recollida e caracterización de lixo mariño o día 15 de maio nas praias da Illa de Sálvora na que participaron voluntarios da Asociación AMICOS, a Asociación Española de Basuras Marinas (AEBAM), os estudantes do Curso Superior en Innovación, Competitividad y Emprendimiento en torno al MAR (ICEMAR) e os alumnos do Centro de Capacitación Forestal de Lourizán.
Neste mesmo senso, coincidindo coa celebración do Día do Medio Ambiente, o Colexio Oficial de Biólogos de Galicia reitera a súa aposta por unha economía baseada no respeto polo ambiente e a sustentabilidade como único medio de conservar a nosa casa común.
