Os signos do cambio climático son cada vez máis evidentes no noso día a día: veráns que se alongan durante varios meses, cambios de temperatura bruscos e fenómenos meteorolóxicos cada vez máis intensos. A todo isto súmase un factor máis silencioso, pero igual de preocupante: o aumento do nivel do mar. Segundo o Grupo Intergubernamental de Expertos sobre o Cambio Climático (IPCC), mesmo se se logra limitar o quentamento global a 1,5°C, o nivel do mar continuará subindo nos vindeiros anos. Pero, como afectará isto ás localidades costeiras de Galicia?
O proxecto Sea Level Rise 3D Map, desenvolvido por Akihiko Kusanagi, combina imaxes de Google Maps e técnicas avanzadas de renderizado para mostrar como o aumento do nivel do mar podería transformar vilas e cidades de todo o mundo.
Este fenómeno débese principalmente a dous factores: por unha banda, a expansión térmica da auga provocada polo exceso de calor absorbido polos océanos, e por outra, o derretemento das capas de xeo de Groenlandia, a Antártida e os glaciares de montaña. Así, o mapa en tres dimensións permite visualizar como o mar avanza progresivamente sobre o litoral a medida que se eleva o seu nivel.
De feito, por cada centímetro que sobe o mar, o litoral pode retroceder ata uns 100 metros, aínda que este efecto depende da topografía do terreo. Así, cidades como Vigo e A Coruña amósanse no modelo como espazos profundamente alterados polo mar se o nivel chegase a subir 20 metros.
Vigo: as vistas a Toralla
Se o nivel do mar se elevase 20 metros por enriba do actual, boa parte do centro de Vigo desaparecería baixo as augas. Zonas próximas á ría, como García Barbón ou o Centro Comercial A Laxe, quedarían completamente inundadas, deixando só á vista das súas cubertas. Mesmo espazos como a Alameda de Vigo pasarían a formar parte do fondo mariño, transformando a paisaxe urbana da cidade olívica.
Hai dous anos, Vigo rexistraba a maior subida do nivel do mar de toda a península, polo que esta situación non dista moito do que podería pasar no futuro. Porén, as zonas máis altas, como o Concello de Vigo, situado nas inmediacións do Monte do Castro, permanecerían a salvo da suba do mar. Algo semellante ocorrería en Teis, onde a rúa principal, Sanjurjo Badía, resistiría en boa medida, mentres áreas máis baixas como Guixar quedarían sepultadas.
As instalacións portuarias e industriais, motor económico da cidade, sufrirían un destino devastador. As terminais marítimas e os estaleiros de Beiramar desaparecerían baixo as augas, cos seus guindastres apenas visibles sobre a superficie. A actividade pesqueira e comercial esvaecería por completo baixo o avance do mar.
Cara ao interior, a subida do río Lagares provocaría a inundación do parque de Castrelos e do Estadio Municipal de Balaídos, afectando tamén ás instalacións de Stellantis. Pola súa banda, o tramo costeiro entre Samil e Cabo Estai desaparecería: praias como O Vao, Canido ou Fuchiños quedarían engulidas, e a auga alcanzaría a estrada de Ricardo Mella. Mentres, a de Camposancos quedaría salvada. Na distancia, fronte unhas illas Cíes somerxidas, só sobresairían os últimos pisos do icónico edificio de Toralla.
A Coruña: unha Torre de Hércules salvada
Ao norte de Galicia, A Coruña atópase rodeada case na súa totalidade polo océano Atlántico: ao oeste, a Enseada de Orzán-Riazor; ao leste, a ría da Coruña. Esta particular xeografía faría que praias e monumentos históricos da cidade herculina desaparecesen baixo as augas ante unha subida do mar de vinte metros.
As emblemáticas praias de Orzán e Riazor quedarían totalmente anegadas, xunto coas instalacións portuarias do Molle de Trasatlánticos e o Molle de Batería. Só sería visible, por exemplo, a parte superior da gran cúpula do Siloterminal de graneis, hoxe destinado ao almacenamento de carbón, cereais e minerais.
Na cidade antiga, desaparecería o Castelo de San Antón e os corredoiros do antigo Hospital Militar estarían cubertos de auga. Esta avanzaría ata a Rúa da Torre, onde o terreo elevado impediría que o mar seguise o seu curso. Así, a monumental Torre de Hércules manteríase en pé, convertida nun dos poucos testemuños que resistirían o embate do océano.
Non todos os símbolos coruñeses correrían a mesma sorte: o campo do Estadio de Riazor aparecería inundado, un recordo do corazón deportivo da cidade. Tamén o Real Club Náutico da Coruña afundiríase baixo o mar, e apenas sobresairían os teitos da recoñecida Sala Pelícano. Os xardíns de Méndez Núñez, pulmón verde do centro urbano, tamén quedarían sumerxidos. Así, esta ferramenta permítemos coñecer que o que hoxe é costa, mañá podería ser mar.
Podes consultar a ferramenta Sea Level Rise 3D Map na seguinte ligazón.
