Dous tramos de estradas de Galicia son líderes en emisión de gases de efecto invernadoiro. O primeiro é a conexión pola AP9 entre Santiago e A Coruña. O segundo, as conexións por autovía entre Vigo e Tui, e entre Vigo e Ponteareas. Todas elas superan as 19.700 toneladas de CO2 equivalente por ano (tCO2eq/year), mentres que o resto da rede principal galega mantense en valores por baixo da metade destes rexistros.
No conxunto do estado, Galicia queda fóra dos puntos con maiores emisións, que se concentran no corredor mediterráneo dende Cataluña a Andalucía. Un cuarto da rede de estradas de España é responsable de máis da metade das emisións de gases de efecto invernadoiro que expulsan os vehículos que circulan por elas, segundo o mapa presentado por investigadores da Universidade Politécnica de Madrid.
As conclusións do traballo sinalan que se poderían reducir as emisións baixando a velocidade máxima permitida, cun significativo efecto a partires de 10 km/h menos en autoestradas.
Os científicos do Centro de Investigación do Transporte (TRANSyT) da UPM analizaron o consumo de enerxía e as emisións de gases de efecto invernadoiro (GEI) debidas ao tráfico de toda a Rede de Estradas do Estado. Os resultados publicáronos na revista Sustainability.
Segundo os autores, Natalia Sobrino e Andrés Monzón, a identificación dos tramos de estradas e corredores que máis contribúan ás emisións GEI é a clave para definir novas estratexias de tráfico baixas en carbono, ante o cumprimento dos compromisos internacionais fronte ao cambio climático.
Para iso desenvolveron un software ou ferramenta de cálculo de pegada de carbono denominada HERA (Pegada Enerxética de operación en Autoestradas) en combinación con sistemas de información xeográfica. Deste xeito identificaron sete corredores principais, que representan o 25% de toda a rede pero contribúen co 51% das emisións GEI do tráfico.
Deses sete corredores, nos que se atopa o do Noroeste que conduce a Galicia, o que máis contribúe é o Mediterráneo cun 17% das emisións. Ademais, en calquera corredor, os tramos con moita carga de vehículos pesados, os de velocidade maior de 100 km/h e as vías con pendentes pronunciadas son os que máis producen gases de efecto invernadoiro na rede.
“Os resultados indican que unha redución da velocidade máxima en 10 km/ h para os vehículos lixeiros no corredor do Mediterráneo podería reducir ata un 3,5% as emisións GEI do corredor”, indica Sobrino, que conclúe: “Isto convértea nunha das estratexias máis eficientes de fronte ao deseño dun sistema de transporte máis sustentable”.
Aquí podes consultar
o artigo publicado en Sustainability
