A última hora do luns na praia de Marmadeiro, no municipio de Ferrol, apareceu varada unha balea xibarte duns dez metros de lonxitude e de entre seis e oito toneladas de peso. Ata o lugar desprazáronse voluntarios de Protección Civil de Ferrol e a Coordinadora para o Estudo dos Mamíferos Mariños (Cemma) que a amarraron á terra para non ser arrastrada pola marea.
Dende o Cemma afirman que é a primeira balea xibarte que vara en Galicia dende o ano 2011. O cetáceo foi visto hai días na zona de cabo Prior, polo que os técnicos cren que puido quedar enganchado polos utensilios de pesca. Antes de retiralo, o Cemma tomará mostras do animal para esclarecer as causas da súa morte e despois será incinerado.
Probablemente, a balea xibarte é unha das especies máis coñecidas destes cetáceos. Ten unhas longas aletas pectorais e son famosas pola súa afición a saltar fóra da auga e polos seus particulares cantos. Nadan en augas costeiras, polo que sufriu miles de capturas dende o século XVI. De feito, calcúlase que só no século XX se mataron sobre 250.000.
Despois de décadas de caza, esta especie logrou recuperarse, con todo, a subida da temperatura do mar é a súa principal ameaza. En 2022 saíu fóra da lista de especies en perigo de extinción mais as condicións climáticas poden obrigalas a abandonar as súas zonas de cría tradicionais nos trópicos.
