Únete á nosa canle de Whatsapp
As plantas tamén sofren estrés e son capaces de manifestalo. Poden expresar o seu malestar coa emisión de sons, con pops e clics que se asemellan ao ruído que facemos cando explotamos un plástico de burbullas. Así o recolle unha investigación publicada na revista Cell. Os seus autores demostraron que as plantas do tomate (Solanum lycopersicum) e o tabaco (Nicotiana tabacum) comunican o seu estrés se lles cortaron o talo ou perciben a falta de auga.
Nós non as escoitamos porque estes sons só poden ser oídos a unha distancia de entre 3 e 5 metros por moitos mamíferos e insectos dada a súa sensibilidade auditiva, por exemplo, ratos. As emisións das plantas atópanse no rango ultrasónico de entre 20 (aproximadamente) e 100 kHz.
Os investigadores conseguiron diferenciar os sons emitidos polas plantas do tomate e do tabaco en dúas condicións de estrés diferentes —plantas secas e cortadas polo talo— cunha precisión do 70% dentro dunha cámara acústica. Usaron modelos de aprendizaxe automática adestrados para clasificar as condicións e especies en función das súas emisións sonoras. Desenvolveron o mesmo proceso nun invernadoiro, nesta ocasión expostos a sons de fondo ausentes na caixa illada. Empregaron de novo mecanismos de aprendizaxe automática para distinguir entre plantas estresadas por seca cunha fiabilidade do 84%.
Os investigadores conseguiron diferenciar os sons emitidos polas plantas do tomate e do tabaco en dúas condicións de estrés diferentes
En condicións de falta de auga, os vexetais empezan a emitir sons antes incluso de amosar sinais de deshidratación visibles. “As plantas emiten moi poucos sons cando se regan, o número de sons ao día aumenta nos seguintes 4 ou 5 días e, a continuación, o número de sons diminúe a medida que a planta seca”, revela a investigación sobre o patrón sonoro das plantas de tomate.
Gravaron con éxito sons de plantas adicionais de diferentes taxóns, como trigo, millo, vide de Cabernet Sauvignon ou unha especie de cactus coñecida como Mammillaria spinosissima. Tamén rexistraron plantas de tomate con virus do mosaico do tabaco. A diversidade de características destes sons aínda está por investigar.
Quedan por estudar outras especies e outras condicións de estrés, como o frío, o ataque de herbívoros, a radiación ultravioleta e outras etapas da vida das especies vexetais, como a floración. Agora, outras preguntas permanecen aínda abertas, como a seguinte: poderían as plantas responder de forma adaptativa aos sons dos seus veciños estresados ou feridos por seca?
Referencia: Sounds emitted by plants under stress are airborne and informative (Publicado en Cell)
