Cruzas en catamarán a ría de Arousa e ves como un grupo de golfiños acompañan a túa travesía. Son en realidade arroaces (Tursiops truncatus) que habitan as augas galegas e que, como nadan moi preto da costa, están habitualmente ameazados por actividades como a pesca e o tráfico mariño. Dende O Grove, o Bottlenose Dolphin Research Institute (BDRI) xa identificou e estudou 200 destes exemplares dende o 2014. Co obxectivo de concienciar sobre a importancia da biodiversidade mariña, da súa conservación e, en especial, dos arroaces, lanzaron un proxecto de apadriñamento dos exemplares a estudo, que neste momento son 40. Tamén ofrece a opción de darlle nome a algúns dos cetáceos identificados.
Segundo explican dende o BDRI, as persoas que desexen adoptar os arroaces poderán coñecer primeiramente as súas características, unha breve biografía e os trazos de personalidade “que os fan únicos”. Dende o centro do Grove tamén indican que os exemplares se poden diferenciar individualmente “grazas ás marcas naturais, como as cicatrices, na súa aleta dorsal”. Un dos exemplos é Tursio, un dos primeiros arroaces identificados no Grove polo equipo do BDRI. Segundo apuntan, ten unha marca no medio da súa aleta dorsal. Tamén lle gusta saltar fóra da auga e “xogar cos seus amigos” entre as bateas da ría de Arousa.
Tursio, denominado así pola Atlantic Barroco Orchestra, tan só é un exemplo. Está Luna, unha femia nova que xa tivo dúas crías dende 2014. Tamén Piipa, outro arroaz que sempre está pendente do seu cachorro, ensinándolle o importante que é socializar cos da súa idade. Pero tamén están Dulce, Maximus, Sophie e outros tantos exemplares, moitos deles sen nome. Dende o BDRI tamén dan a posibilidade de poñerlles un. Para iso, débense aboar 200 euros e se só se quere apadriñar un exemplar, serían 50 euros. “Os fondos de dito programa dedícanse exclusivamente ás actividades de estudo e conservación da poboación de arroaces residentes na ría de Arousa”, expoñen dende o centro do Grove.
Podes saber máis do proxecto nesta ligazón.
