A Xunta de Galicia acaba de prohibir o marisqueo na Pobra do Caramiñal por unha vertedura de fuel descoñecida. Como consecuencia da contaminación detectada este xoves nesta zona da ría de Arousa e co gallo de evitar que chegen ao mercado productos mariños en condicións non aptas para o consumo humano, o Instituto Tecnolóxico para o Control do Medio Mariño de Galicia decidiu prohibir cautelarmente a extracción de moluscos bivalvos cultivados en viveiros flotantes.
O helicóptero Pesca I foi o que deu aviso durante a mañá deste xoves sobre o avistamento de “manchas de hidrocarburos” moi preto da costa de Meloxo e da Pobra do Caramiñal. Isto fixo que a consellería do ramo activase de novo o Plan Nacional de Salvamento contra a Contaminación, igual que aconteceu este martes logo da chegada de fuel a dúas praias da Illa de Arousa.
Dende o Goberno galego aínda non aclararon se as dúas verteduras de hidrocarburos están relacionadas. Mariscadores e mariscadoras da ría de Arousa confirman que os helicópteros Pesca I e Helimer e os buques Sebastián de Ocampo e María Pita patrullan a ría en busca de novas verteduras contaminantes xunto cos medios da Sociedade de Salvamento e Seguridade Marítima (Sasemar). Malia todo, reclaman responsabilidades: “Como se pode explicar que avisando o buque de que fai a vertedura chegue a entrar na ría de Arousa? Onde está a oceanografía operacional de Puertos del Estado e da Xunta de Galicia?”, denuncian dende a Plataforma en Defensa da Ría de Arousa.
