Chegarán máis pellets á costa nos próximos días. Así o anunciou este martes a vicepresidenta segunda e conselleira de Medio Ambiente, Territorio e Vivenda, Ángeles Vázquez, que reclamou a colaboración do Goberno para actuar “dentro do mar”, o ámbito “que lle corresponde”.
Vázquez fixo este anuncio de acordo con as predicións de Meteogalicia sobre as correntes mariñas, que apuntan a que a partir do día 13 podería chegar ao litoral galego unha nova onda de restos procedentes do buque Toraconao, que perdeu un contedor cargado con pequenas bólas de plástico o pasado 8 de decembro.
Limpeza de praias
En declaracións aos medios tras reunirse con responsables de Meteogalicia para analizar a evolución das correntes, a conselleira anunciou que en función das mesmas tomarán “as decisións pertinentes” relacionadas coa limpeza de praias. A Xunta pediu “calma” aos voluntarios que limpan as praias, xa que a súa colaboración de forma desordenada ou sen observar as recomendacións básicas pode ser contraproducente.
Ata o sábado, a recollida será “mínima” porque as correntes “non empuxan o pellet cara a fóra”, pero a partir do sábado, “en función dos sacos que haxa no mar, si podería estar a chegar máis pellet á costa”.
A Xunta, anunciou, realizará “un seguimento exhaustivo”, do que dará coñecemento ás 12,00 horas e ás 18,00 horas “en función das mareas”. Precisamente, na mañá deste martes sinalou que era “difícil” nalgunhas praias poder realizar traballos porque a marea “estaba alta e os pellets flotan”.
O 10% recollido
Polo momento, sinalou que “nin sequera” se recolleu “o 10%” do total de sacos vertidos. Vázquez anunciou que se sumarán 100 operarios, a través da empresa pública Seaga, aos 200 xa activos con Tragsa e as consellerías de Medio Ambiente e Mar. Estes traballadores encargaranse de retirar os pellets, pero tamén o resto de plásticos que haxa nos areais, segundo destacou a vicepresidenta segunda.
A vicepresidenta segunda aproveitou para agradecer o traballo dos voluntarios e tamén insistiu en pedir “tranquilidade”. Trátase dun produto que, segundo os resultados da ficha técnica, tal e como destacou Ángeles Vázquez, “non é unha substancia ou mestura perigosa” e, á súa vez, “é utilizado para materiais e obxectos plásticos destinados a entrar en contacto cos alimentos“.
“O que si podo asegurar é que da ficha técnica que envía o avogado do barco e que tamén o Miteco lle envía á Xunta é que non se trata dun material perigoso e non é un material tóxico, o que non quere dicir que non sexa nocivo para o Medio Ambiente, todo plástico é nocivo“, manifestou.
Sobre como se xestionan estes residuos, Vázquez asegurou que se realiza a recollida correspondente, deposítanse no contedor e hai dúas opcións: ou o fan os concellos a través do xestor que eles teñan ou o fai a Xunta a través de Tragsa cos xestores autorizados neste tipo de residuos.
