Únete á nosa canle de Whatsapp
O Grupo de Xenética do Desenvolvemento de Plantas da Misión Biolóxica de Galicia do CSIC participa no proxecto “Novas variedades de xudía para tendencias emerxentes no consumo de hortalizas”, no que tamén colaboran a Universidad de Almería e dúas empresas do sector, Lara Castañeda e Ramiro Arnedo, coordinadora esta última do proxecto.
O traballo, co nome de Optibean, conta con financiamento privado e público a través do Plan Estatal de I+D+i, ten como obxectivo a cooperación entre empresas e científicos para “promover o desenvolvemento de novas tecnoloxías, a aplicación empresarial destas innovacións e a creación de novos produtos e servizos. Neste senso, subliñan os seus impulsores, “a xudía verde é o cultivo de hortaliza que nos últimos anos presentou maiores incrementos no consumo” en España.
Porén, produciuse tamén un notable descenso na superficie de cultivo debido fundamentalmente á competencia exercida polos produtos procedentes de terceiros países. Ante isto, segundo a investigadora Marta Santalla Ferradás, da MBG, “o consumidor español valora a calidade do produto tradicional, polo que na actualidade pode considerarse que o mercado español está en expansión”, o que abre oportunidades para a mellora da calidade da hortaliza. O proxecto busca responder así á competitividade das importacións doutros países, “cun maior valor engadido mediante o prestixio e a identidade da produción nacional”.
I+D+i para a xudía
Con estas premisas, o equipo de Optibean busca “contribuír á innovación no sector agroalimentario e propiciar a súa diversificación cara a novos produtos de xudía verde que ofrezan mellor calidade e cuxos sistemas de produción minimicen o impacto medioambiental, o que terá unha repercusión positiva na apertura de novas canles de comercialización e na mellora da sustentabilidade da produción agraria”, destaca Marta Santalla.
A investigación abordará tamén a mellora xenética de variedades tradicionais para optimizar o seu potencial produtivo e unha maior calidade de valor engadido, o que repercutirá na cadea de produción. Para isto abriranse catro liñas de actuación: estudo da agrodiversidade da xudía e selección de novas variedades para o mercado; mellora da calidade e conservación post-colleita precisa para o mercado fresco; mellora xenética da resistencia a enfermidades como estratexia para a produción sostible; e análise da sustentabilidade económica do cultivo das novas variedades élite e identificación de estratexias de valoración e determinación do impacto socioeconómico.
